काठमाडौं । अर्थमन्त्री डा‍.प्रकाशशरण महतले घरमा नै बनेको खाना खाएर बजेट निर्माण गरेका छन् ।

लोकदर्शन रेग्मी अर्थसचिव भएको बेला बजेट निर्माणको क्रममा पाँचतारे होटेलबाट खाना मगाइएको थियो । अहिले अर्थमन्त्री महतले भने घरबाट नै खाना लगेर खाने गरेका छन् ।

यसअघि, युवराज खतिवडाले पनि घरबाट लगेर तथा मन्त्रालयको क्यान्टिनमा बनेको खाना खाएर बजेट बनाएका थिए ।

अर्थमन्त्री महत बजेट लेखनमा जेठ १ गतेदेखि निरन्तर खटिरहेका छन् । जेठ १ गतेदेखि बजेट निर्माण व्यस्त भएका मन्त्री महत बिहान ७ बजे अर्थ मन्त्रालय पुग्ने गरेका छन् ।

त्यसपछि मन्त्रालयमा हुने भेटघाटहरु पनि बन्द गरेर अर्थमन्त्रीका हरेक क्षण बजेट निर्माणमा मात्र केन्द्रित भयो । डरलाग्दो रुपमा घट्दो राजश्व संकलनको अवस्था, बजेट कार्यान्वयनमा देखिएको समस्या, आर्थिक वर्षको अन्तिममा आएर हुने रकमान्तरणको समस्या, स्रोत सुनिश्चित नभई प्रभाव र पहुँचका भरमा दिइएका स्रोत सुनिश्चिताले बजेटमा पारेको असरलगायतका विषयहरुमा केन्द्रित भएर निरन्तर छलफल गरेका छन् ।

अर्थमन्त्री महतको सचिवालयका अनुसार बिहान ७ बजे मन्त्रालय पुग्दा बजेट लेखन टिम मन्त्रालय पुगिसकेको हुन्छ । टिमसँगको छलफलपछि बजेट लेखनमै काम सुरु गर्छन् । मन्त्री महतले बजेट लेखनका लागि आवश्यक पर्ने मन्त्रालयकै टिमका सदस्यहरु अन्य व्यक्तिसँग कार्यकक्षमा भेटघाट बन्द गरेका छन् ।

७ बजे मन्त्रालय पुग्ने अर्थमन्त्रीले महत बिहान ११ बजे खाना खानको लागि १५ मिनेटको समय छुट्याएका छन् । उनले खाने खाना सधैँ आफ्नै घरबाट टिफिनमा आउने गर्छ ।

“शाकाहारी भएकोले पनि अर्थमन्त्री महतले स्वस्थ खानेकुरा, फलफूल आफ्नै घरबाट ल्याएर खाने गरेका छन् । खानापछि बजेट लेखनको काममा फर्कन्छन्,” अर्थमन्त्रीको सचिवालयले भन्यो ।

पछिल्लो समय अर्थ मन्त्रालयका सबै ढोका बन्द गरेर अर्थका कर्मचारीबाहेकका कसैलाई पनि मन्त्रालयमा प्रवेश निषेध गरेर बजेट लेखन भइरहेको छ । अर्थमन्त्री महतले जेठ ३ गतेदेखि निजी निवासमा सामूहिक रुपमा १५ मिनेट पार्टीका कार्यकर्ताले भेट्नेबाहेक सबै भेटघाट बन्द गरेका छन् ।

मन्त्री महत निजी निवासदेखि मन्त्रालय अनि प्रधानमन्त्री कार्यालय, मन्त्रिपरिषद् र संसद् बैठकबाहेक अन्य कुनै पनि कार्यक्रमहरुमा सहभागी नभएर बजेट लेखनमै केन्द्रित छन् । उनी मन्त्रालयका विभिन्न महाशाखा, शाखाहरुमा कर्मचारीहरुको दैनिक समन्वयमा रहिरहेका छन् ।