काठमाडौं । दक्षिण कोरियाली अटो कम्पनी 'हुन्डाई'ले भारतको तमिलनाडु राज्यमा दुई खर्ब भारतीय रुपैयाँ लगानी गर्ने भएको छ ।
आफ्नो दीर्घकालीन लगानी योजना घोषणा गर्दै कम्पनीले सन् २०२३ देखि सन् २०३२ सम्म १० वर्षको अवधिमा २.४५ अर्ब अमेरिकी डलर लगानी गर्ने बताएका हो ।
यो लगानी विद्युतीय सवारीसाधन र यसको इकोसिस्टम बनाउनका लागि लक्षित छ । यसका लागि हुन्डाई भारतका एमडी एवं सीईओ उन्सु किम र गाइडेन्स तामिलनाडुका सीईओ एवं आईएएस विष्णु वेणुगोपालनबीच मुख्यमन्त्री एमके स्टालिनको उपस्थितिमा एमओयूमा हस्ताक्षर भएको थियो ।
कार्यक्रममा अर्थमन्त्री थङ्गम थेनारसु, उद्योग, लगानी प्रवर्द्धन र वाणिज्यमन्त्री टीआरबी राजा, आईएएस कृष्णन एस र अन्य वरिष्ठ अधिकारीहरूको पनि उपस्थिति थियो ।
कार्यक्रममा उन्सु किमले भने, "हाम्रो दीर्घकालीन दृष्टिकोणको एक हिस्साको रूपमा हामीले तामिलनाडुलाई भारतमा हुन्डाईको विद्युतीय सवारी उत्पादनको आधारको रूपमा विकास र स्थापना गर्ने योजनालाई अन्तिम रूप दिएका छौं। यसले हामीलाई हाम्रो पोर्टफोलियोलाई सुदृढ गर्न र हाम्रा गाडीहरूमा उत्कृष्ट सुविधाहरू र प्रविधिहरू प्रदान गर्न मद्दत गर्नेछ जसले हाम्रो ग्राहकको आकांक्षालाई पूरा गर्नेछ ।"
यो लगानीबाट हुन्डाईले वार्षिक एक लाख ७८ हजार क्षमताको ब्याट्री प्याक एसेम्बली इकाई स्थापना गर्नेछ । पाँच वर्षको अवधिमा प्रमुख राजमार्गहरूमा प्रमुख स्थानहरूमा १०० वटा चार्जिङ स्टेसनहरू स्थापना गर्नेछ ।
यसमा १५० किलोवाट प्लस ६० किलोवाटका पाँच डुअल अल्ट्रा फास्ट चार्जिङ स्टेसन, १५० किलोवाटका १० सिंगल फास्ट चार्जिङ स्टेसनहरू र ६० किलोवाट डीसीका ८५ फास्ट चार्जिङ स्टेसन समावेश छन् ।
हुन्डाई मोटर इन्डियाले विद्युतीय र आईसीई गरी वार्षिक गाडी उत्पादनलाई आठ लाख ५० हजार युनिटमा पुर्याउने लक्ष्य राखेको छ ।
