काठमाडौं । रोड्रिगोले खेल सकिन एक मिनेट बाँकी रहँदा गोल गरेपछि स्पेनिस ला लिगामा रियाल मड्रिडले रायो भालेकानोलाई बर्नबेउमा २–१ ले पराजित गरेको छ ।

घुँडाको समस्याका कारण भिनिसियस जुनियर टिमबाहिर रहँदा पनि रियाल मड्रिडका सहकर्मीहरुले उनीप्रति समर्थन जनाएका थिए । आइतबार भ्यालेन्सियाविरुद्ध खेल्दा रंगभेदी व्यवहार भएको भन्दै भिनिसियस आक्रोषित र भावुक बनेका थिए । सोही कारण भिनिसियसप्रति समर्थन जनाउन भालेकानोविरुद्ध रियाल मड्रिडका सबै खेलाडी ‘रंगभेद, फुटबलबाट बाहिर’ लेखिएको ब्यानर बोकेका थिए ।

खेलको ३१औं मिनेटमा करिम बेन्जेमाले गोल गर्दै घरेलु टिमलाई अग्रता दिलाएका थिए । तर, बेन्जेमाको यो अग्रता लामो समय टिक्न सकेन । त्यसको ६ मिनेटपछि नै राउल डे टमसले गोल गर्दै पाहुना टिमलाई खेलमा फर्काएका थिए ।

तर, खेलको निर्धारित समय सकिन एक मिनेट बाँकी रहँदा रोड्रिगोले निर्णायक गोल गरेपछि रियालले जित निश्चित गर्यो ।

जितसँगै रियाल मड्रिड ला लिगा अंक तालिकाको दोस्रो स्थानमा उक्लिएको छ । बुधबार नै भएको खेलमा एकै सहरको अर्को प्रतिद्वन्दी एट्लेटिको मड्रिड पुछारबाट दोस्रो स्थानमा रहेको स्पान्योलसँग ३–३ को बराबरीमा रोकिएपछि रियाल दोस्रो स्थानमा उक्लिएको हो ।

रियालले ३६ खेलबाट ७४ अंक जोडेको छ । जुन तेस्रो स्थानको एट्लेटिको मड्रिडभन्दा एक अंक धेरै हो । समान खेल खेलेको एट्लेटिकोले ७४ अंक जोडेको छ ।

स्पेनिस लिगको उपाधि भने बार्सिलोनाले जितिसकेको छ । बार्सिलोना ८५ अंकसहित शीर्ष स्थानमा छ ।