काठमाडौं । नेपाली राष्ट्रिय भलिबल टिमका मुख्य प्रशिक्षक यान ब्रान्ड्टले नेपालले राम्रो प्रशिक्षण नपाउनु भारतसँग हार्नुको कारण भएको प्रतिक्रिया दिएका छन् ।

बुधबार राष्ट्रिय खेलकुद परिषद् (राखेप) परिसरमा रहेको कभर्डहलमा भएको सेन्ट्रल एसियन भलिबल एसोसिएसन (काभा) महिला भलिबल च्यालेन्ज कप–२०२३ मा भारतसँग ३–१ को सेटमा पराजित भयो ।

खेलको पहिलो र दोस्रो सेट गुमाएको नेपालले तेस्रो सेट भने जितेको थियो । तर, चौथो सेट पुनः भारतले आफ्नो पक्षमा पारेपछि भारतले खेलको नतिजा पनि आफ्नो पक्षमा राख्यो ।

खेलपछि नेपाली टिमका मुख्य प्रशिक्षक ब्रान्ड्टले प्रशिक्षणमा भारतको स्तर टिमसँग खेल्न नपाउनु हारको कारण भएको बताए ।

“हामीले प्रशिक्षण यस स्तरका टिमसँग खेल्न पाएनौं । मैले स्पष्टसाथ भन्नुपर्छ, साढे दुई महिना तयारी गर्दा हामीले आफ्नै टिमका सदस्यसँग र कहिलेकाही केटाहरूसँग खेल्न पायौं,” ब्रान्ड्टले भने ।

पहिलो सेटमा १२–२५ ले हारेको नेपाल दोस्रो सेटमा २४–२६ ले पछि परेको थियो । यस्तै, तेस्रो सेट २५–२१ ले आफ्नो पक्षमा पार्दा नेपालले चौथो सेट भने २१–२५ ले नै भारतलाई सुम्पियो । प्रशिक्षक ब्रान्ड्ट नेपाली टिमको यो प्रदर्शनमा सन्तुष्ट देखिए ।

“पहिलो सेटबाहेक खेल राम्रो थियो । पहिलो सेटमा हामीले सबै भुल्यौं । तर, पहिलो सेट खराब भए पनि पुनरागमन गर्न सक्नु राम्रो हो । हामीले त्यस्तो टिमको सामना गर्दै थियौं, जो शारीरिक रूपमा निकै सशक्त थिए,” उनले भने ।

उनले थपे “उनीहरूको सेटर राम्रो थिए, बल निकै राम्रोसँग खेलाइरहेका थिए । हामीले रिसिभमा राम्रो गर्न सकेनौं । दोस्रो सेटमा सारा आएपछि राम्रो खेल्न थाल्यौं । रिसिभमा आत्मविश्वास देखायौं । र, रिसिभमा राम्रो प्रदर्शन पनि गर्यौं । यो टिमसँग खेल्नुअघि हामीले आवश्यकअनुरुपको प्रशिक्षण  पाएनौं ।”

“दोस्रो सेटपछि हामी पनि खेल्न सक्छौँ भन्ने देखायौं । दोस्रो सेटमात्र हैन हामीले तेस्रो सेट र चौथो सेटमा पनि उत्कृष्ट प्रदर्शन गर्यौं । र, यसले पक्कै पनि हामीलाई राम्रो भलिबल खेल्न सक्छौं भन्ने आत्मविश्वास दिन्छ । हामी शारीरिक रूपमा सशक्त टिमसँग पनि राम्रो खेल्न सक्छौं भन्ने देखाएका छौँ ।”

उनले भारतलाई जितमा बधाई दिँदै भारतविरुद्ध नेपाली टिमले समर्पण गरेको बताए ।

“भारतलाई बधाई छ । उनीहरूको टिम निकै राम्रो छ । आशा छ, हामी फाइनलमा भेट्नेछौँ । आजको खेलबाट धेरै कुरा सिके । पहिलो, हामीले भारतसँग सर्भ अझै कडा गर्न आवश्यक छ । हामीले धेरैभन्दा धेरै डाइरेक्ट प्वाइन्ट बनाउन आवश्यक छ, नत्र हामी समस्यामा पर्नेछौँ,” प्रशिक्षक ब्रान्ड्टले भने, “दोस्रो, म रिसेप्सनदेखि सन्तुष्ट छु । हामीले रिसेप्सनको यो स्तरलाई कायम राख्न आवश्यक छ । अरुणा (अरुणा शाही, कप्तान) लाई थाहा छ, उसले अझै छिटो खेल्न पर्छ भन्ने । हामीले भारत र काजकिस्तानविरुद्ध अझ छिटो खेल्नुपर्ने हुन्छ । आजको खेलको सबैभन्दा ठूलो शिक्षा भनेको हामी फाइटर्स भएको प्रमाणित भयो । हामीले समर्पण गरेनौं । प्रत्येक बलमा लड्यौं । हामीले बललाई नियन्त्रणमा राख्यौं, डिफेन्ड राम्रो गर्यौं ।”

यस्तै, नेपाली टिमकी कप्तान अरुणा शाहीले प्रशिक्षकको योजनालाई कार्यान्वायन गर्न नसक्दा खेलको नतिजा आफ्नो पक्षमा राख्न नसकेको बताइन् ।

“आजको हारबाट हामीले धेरै कुरा सिक्यौं । हामीले प्रशिक्षणको बेला यस्तो म्याच खेल्न पाएको भए, प्रतिस्पर्धा गर्न आज अझै सहज हुन्थ्यो होला,” उनले भनिन्, “प्रशिक्षकले बनाएको योजनालाई कार्यान्वायन गर्न सकेको भए हामीलाई सहज हुन्थ्यो खेल्नलाई । प्रशिक्षकका कुरा कतिपय ठाउँमा प्रयोगमा ल्याउन सक्यौं तर कतिपयमा सकेनौं । यसले अलिकति गाह्रो भयो ।”

अरुणाले भारतसँग खेल्दा नेपाली टिमले कुनै पनि किसिमको दबाब महसुस नगरेको बताइन् ।

“हामीले फ्रन्टमा खेल्न नसके पनि डिफेन्डिङ पोजिशनमा योजनाअनुरुप प्रदर्शन देखायौं । भारत भनेर हामीले दबाबमा खेलेनौं । सेमिफाइन प्रवेश गरिसकेकाले फ्रि भएर खेल्यौं । दबाब लिएका थिएनौं । पहिलो सेटमा भारतले अग्रतालाई सहजै फराकिलो हामी तल पर्यौं । होइन भने अरु बेला हामी भारत भनेर दबाबमा आएका थिएनौं । हामी खेल्न सक्छौं भन्ने थियो । पहिले भारत भनेपछि फरक अनुभव हुन्थ्यो, त्यो अहिले हुँदैन,” उनले प्रष्ट्याइन् ।

भारतविरुद्ध प्रतिभा मालीको अभाव कत्तिको खड्कियो भन्ने प्रश्नमा कप्तान अरुणाले आफ्नो भावना रोक्न सकिनन् । उनी केहीबेर मौन रहिन् । अरुणाको मौनता बुझेर प्रशिक्षक ब्रान्ड्टले जवाफ नदिने पनि मिल्ने भन्दै सम्झाउन थाले ।

अरुणा प्रश्नको जवाफ नदिई पोस्ट म्याच प्रेस कन्फेरेन्स हलबाट भक्कानिदै बाहिरिइन् । यसपछि प्रतिभाको बारेमा आएको प्रश्नप्रति पत्रकारसँग केही आक्रोशित बनेका प्रशिक्षक ब्रान्ड्टले टिमबाहिरका खेलाडीको बारेमा सोधेर आफ्नो खेलाडीलाई अफ्ठ्यारोमा नपार्न आग्रह गरे ।

“खेलाडीहरूले जो टिममा छैन उसको बारेमा नसोध, अहिले खेलिरहेका खेलाडीबारे सोध । हामीले यसबारे केही गर्न सक्दैनौं । त्यसैले मेरो खेलाडीहरुलाई समस्यामा नपार,” प्रशिक्षक ब्रान्ड्टले भने ।