काठमाडौं । नेपाली महिला भलिबल टिमले काभा महिला भलिबल च्यालेन्ज कपमा आज तुलनात्मक रूपमा कमजोर बंगलादेशविरुद्ध प्रतिस्पर्धा गर्दै छ । नेपालले सोमबार कीर्गिस्तानलाई ३–० सोझो सेटमा हराउँदै प्रतियोगितामा सानदार सुरुआत गरेको थियो ।

नेपालले आजको खेल जिते सेमिफाइनलमा स्थान पक्का गर्नेछ । बंगलादेश पहिलो खेलमा भारतसँग ३–० को सेटमा पराजित भएको थियो ।

नेपालबाट हिजो मिडल ब्लकर संगम महतो र स्पाइकर रिमा कुँवरले ‘डेब्यु’ गरेका थिए । नेपालको टिममा ६ नयाँ अनुहार छन् । बंगलादेश कमजोर भएका कारण आजको खेलमा बाँकी खेलाडीले पनि डेब्यु गर्ने सम्भावना प्रबल छ ।

आज स्पाइकर पूजा चौधरी, मिडल ब्लकर कविता भट्ट, सेटर प्रगति नाथ र लिबेरो शान्तिकता तामाङले डेब्यु गर्ने सम्भावना प्रबल छ ।

नेपाल र बंगलादेशबीचको खेल त्रिपुरेश्वरस्थित राष्ट्रिय खेलकुद परिषद् (राखेप)को कभर्ड हलमा दिउँसो ३ बजेदेखि हुनेछ । त्यसअघि, आजै भारतले कीर्गिस्तानविरुद्ध प्रतिस्पर्धा गर्नेछ ।

यस्तै, समूह ‘बी’मा आज श्रीलंकाले काजखस्तान र उज्वेकिस्तानले माल्दिभ्सविरुद्ध प्रतिस्पर्धा गर्नेछ ।

आजका खेल 
१. कीर्तिस्तानविरुद्ध भारत – १०ः०० बजे
२. श्रीलंकाविरुद्ध काजखस्तान – १२ः३० बजे
३. नेपालविरुद्ध बंगलादेश – ३ः०० बजे
४. उज्वेकिस्तानविरुद्ध माल्दिभ्स – ६ः०० बजे