काठमाडौं । प्रमुख प्रतिपक्ष दल नेकपा (एमाले)का सांसद योगेश भट्टराईले जनयुद्ध शब्दलाई मान्यता दिए नेपाली कांग्रेसको इतिहास नामेट हुन सक्ने चेतावनी दिएका छन् ।

सोमबार प्रतिनिधिसभा बैठकमा उनले नीति तथा कार्यक्रममा समावेश गरिएको जनयुद्ध शब्द कांग्रेसले स्वीकार गरेको हो ? भन्दै प्रश्न गरे । उनले विद्वान फ्रान्सेस फुकुमायाको पुस्तकको चर्चा गर्दै साँच्चै कांग्रेसले जनयुद्ध दिवस मानेको भए ‘इन्ड अफ हिस्ट्री’ हुने चेतावनी दिए ।

“जनयुद्ध भन्ने शब्द यहाँ उचारण भएको छ । यो विषयमा संविधानसभामा पर्याप्त बहस भएको हो । ७२ को संविधानपश्चात् सरकारी दस्तावेजमा उल्लेख भएको थिएन । पहिलोपटक प्रम प्रचण्डले यो शब्द राष्ट्रपतिको मुखबाट वाचन गराउनुभएको छ,” उनले भने, “बीपी, गणेशमान, किसुनजी, गिरिजाप्रसादको पार्टी यति निम्छरो नेपाली कांग्रेसको हालत देखिएको छ । यदि, यो एक नम्बर बुँदा कांग्रेसले स्वीकार गर्छ भने कांग्रेसको इन्ड अफ द हिस्ट्री हो । यो शब्द र स्प्रीटलाई उहाँहरूले स्वीकार गर्नुहुन्छ भने इन्ड हुन्छ ।”

उनले गठबन्धनको सबैभन्दा ठूलो दल कांग्रेसको सहमतिबिना नीति तथा कार्यक्रममा यो शब्द पर्न नसक्ने जिकिर गरे । यसबारे कांग्रेस सभापति शेरबहादुर देउवाले जवाफ दिनुपर्नेमा उनले जोड दिए ।