काठमाडौं । इरिक लामेलाले थप ३० मिनेट समयको पाँचौँ मिनेटमा गरेको गोलमा युरोपा लिगको अनुभवी टिम सेभियाले बिहीबार राति युभेन्टसविरुद्ध २–१ तथा समग्रमा ३–२ को नतिजा निकाल्दै फाइनलमा स्थान बनाएको छ ।

गएको हप्ता सम्पन्न पहिलो लेगमा सेभियाले इटाली भ्रमणमा १–१ को बराबरी खेलेको थियो । गए राति सेभियाको घरेलु मैदानमा पाहुना टोली युभेन्टसले ६५औँ मिनेटमा डुसान भ्लाहोभिकको गोलबाट अग्रता लिएको थियो । ७१औँ मिनेटमा सेभियाका सुसोले बराबरी गोल फर्काएपछि खेल थप समयतर्फ धकेलिएको थियो ।

३० मिनेट थप समयको पाँचौँ मिनेटमा लामेलाले हेडमार्फत गरेको गोल सेभियाको जितमा निर्णायक बन्यो । ११५औँ मिनेटमा मार्कोस अकुनाले दोस्रो पहेँलो कार्डको सामना गरेपछि सेभिया १० खेलाडीमा सीमित भएको थियो । तर, युभेन्टसले त्यसको फाइदा उठाउन सकेन ।

सेभियाले अब उपाधिका लागि जोजे माउरिन्होको एएस रोमाविरुद्ध प्रतिस्पर्धा गर्नेछ । रोमाले गए राति जर्मन बुन्डेसलिगाको क्लब बायर लेभरकुसेनविरुद्ध गोलरहित बराबरी खेले पनि समग्रमा १–० को नतिजा निकाल्दै फाइनलमा स्थान पक्का गरेको हो ।

सेभिया अहिले लिगको दशौँ स्थानमा छ । सेभियाले जारी सिजन दुई प्रशिक्षकलाई बर्खास्त गरिसकेको छ । च्याम्पियन्स लिगको समूह चरणबाटै बाहिरिएको सेभियाले यसअघि नकआउट चरणमा पीएसभी आइन्डहोभन, फेनरबाच र म्यानचेस्टर युनाइटेडलाई हराएको थियो ।

“यो पागलपन हो । यति बेला अविश्वसनीय र यो अद्भुत क्षणको आनन्द लिने समय हो,’’ सेभिल्लाका कप्तान जेसस नाभासले भने, “हाम्रा समर्थक अविश्वसनीय छन् । उनीहरू यो सबै कुराको हकदार छन् । हामीले केही कठिन महिनाहरू पार गरेपछि पुनरागमनका लागि हामीभित्र रहेको साहस देखाएका छौँ । समर्थकको साहसले हामीलाई बोकेको छ । हामी फेरि अर्को युरोपा लिगको फाइनलमा पुगेका छौँ । म सानैदेखि यस टिममा छु । हरेक खेल धेरै जोसका साथ खेलिरहेको छु । अहिले रमाइलो गर्ने क्षण हो ।’’