काठमाडौं । युवा मिडफिल्डर इडोवार्डो बोभले दोस्रो हाफमा गरेको गोलमा एएस रोमाले बिहीबार राति युरोपा लिग सेमिफाइनलको पहिलो लेगमा बायर लेभरकुसेनलाई १–० ले हराएको छ । 

रोमाका उत्पादन २० वर्षीय बोभले ६३औँ मिनेटमा गरेको गोल रोमाको जितमा निर्णायक बन्यो । बोभको युरोपियन प्रतियोगितामा यो पहिलो गोल हो । 

जितसँगै जोजे माउरिन्होको प्रशिक्षणमा रोमाले लगातार दोस्रो युरोपियन उपाधि जित्ने सम्भावना कायम राखेको छ । रोमाले गत सिजन युरोपा कन्फरेन्स लिगको उपाधि जितेको थियो । रोमा दोस्रो लेगका लागि अर्को साता जर्मनी जानेछ । 

रोमा र लेभरकुसेनबीचको विजेता फाइनलमा उपाधिका लागि युभेन्टस र सेभियाबीचको विजेतासँग प्रतिस्पर्धा गर्नेछ । युभेन्टस र सेभियाले गएराति सम्पन्न पहिलो लेगमा १–१ को बारबरी खेलेको थियो । 

“म विशेषगरी नतिजाबाट खुसी छु,’’ रोमाका मिडफिल्डर बोभले भने, “यो पहिलो लेग जित्नु आवश्यक थियो र त्यही इच्छाशक्तिका साथ खेल्नु आवश्यक थियो । आज हामीले जोशका साथ खेल्यौं । हामी खुसी छौं । सुरुमा उनीहरूले हामीलाई केही गाह्रो बनायो । हामीलाई सम्हालिन केही समय लाग्यो । सम्हालिएपछि हामी खेलमा राम्रो नियन्त्रण राख्न सफल भयौं ।’’

लेभरकुसेन अहिले जाभी अलोन्सोको प्रशिक्षणमा छ । अलोन्सोले रियाल मड्रिडमा माउरिन्होको प्रशिक्षणमा तीन सिजन खेलेका थिए । माउरिन्होको प्रशिक्षणमा अलोन्सोले १५१ खेल खेलेका छन् । त्यसकारण गएराति रोमा र लेभरकुसेनबीचको खेललाई ‘गुरु–चेला’बीचको प्रतिस्पर्धाका रुपमा पनि हेरिएको थियो ।