काठमाडौं । जापानले देशभित्र एसियामै पहिलोपटक नेटोको कार्यालय खोल्न वार्ता गरिरहेको त्यहाँका विदेशमन्त्रीले सीएनएनसँगको एक विशेष अन्तर्वार्तामा खुलासा गरेका छन् ।

“हामी पहिले नै छलफलमा छौँ, तर अहिलेसम्म अन्तिम निर्णय भइसकेको छैन,” विदेशमन्त्री योशिमासा हयाशीले भनेका छन् ।

गत वर्ष रूसले युक्रेनमा सुरु गरेको युद्धले युरोपको सीमाभन्दा बाहिर जापानलाई क्षेत्रीय सुरक्षाबारे पुनर्विचार गर्न बाध्य तुल्याएको हयाशीको भनाइ छ ।

“यसबारे हामीले छलफल गर्नुको कारण यो हो कि रूसले युक्रेनमाथि गरेको आक्रमणपछि विश्व बढी अस्थिर भएको छ,” उनले भने, “पूर्वी युरोपमा भइरहेको घटनाक्रम पूर्वी युरोपको मुद्दामा मात्र सीमित छैन । यसले प्रशान्त क्षेत्रको अवस्थालाई प्रत्यक्ष असर गर्छ । यसैले पूर्वी एसिया हामी र नेटोबीचको सहयोग महत्त्वपूर्ण हुँदै गइरहेको छ ।”

गत हप्ता एक विज्ञप्तिमा नेटोकी प्रवक्ता ओना लुङ्गेस्कुले जापानसँग लामो समयको सहकार्य रहेको भन्दै त्यहाँ सम्पर्क कार्यालय खोल्न नेटोका सबै सहयोगीसँग छलफलमा जाने बताएकी थिइन् ।

रूसले युक्रेनमा गरेको आक्रमणपछि दशकौंदेखि तटस्थ रहेका नर्डिक मुलुक फिनल्यान्ड र स्विडेन पनि नेटोमा सामेल हुन अघि सरेका थिए । फिनल्यान्ड गत महिना औपचारिक रूपमा नेटोमा सामेल भइसकेको छ भने स्विडेनको विषयमा भने टर्कीले अवरोध गरेको छ ।