काठमाडौं । राष्ट्रिय स्वतन्त्र पार्टी (रास्वपा)की सांसद सोविता गौतमले विनियोजन विधेयकमा उल्लेख भएका सिद्धान्त र प्राथमिकतामा ल्याउनुपर्ने कानुन फास्टट्र्याकबाट ल्याए बजेटप्रति आफ्नो विश्वास रहने बताएकी छन् । 

आजको प्रतिनिधिसभा बैठकमा उनले विगतकै जस्तो अवस्था नरहोस् भन्नेमा अर्थमन्त्रीको ध्यानाकर्षण गराइन् ।

“विगतमा जस्तो सिद्धान्त र प्राथमिकता, नीति तथा कार्यक्रममा महत्वाकांक्षी कुरा आउने र कानुनहरु ५०–६० वर्ष, अंकुशे कानुन विद्यमान रहने अवस्था छ,” उनले भनिन्, “यसले हाम्रो बजेट एकादेशको कथा जस्तो नहोस् ।”

विधेयकको सिद्धान्त र प्राथमिकतामा युवाहरुलाई देशमै रहन मन लाग्ने खालको विषय नपरेको बताइन् । उनले उत्कृष्ट प्राध्यापक देशमा फर्किएर पढाउने वातावरण बनाउनुपर्ने बताइन् ।