नेपाल उद्योग वाणिज्य महासंघको साधारणसभा चैत २८ र २९ मा हुँदैछ ।  विधानअनुसार तीन वर्षपछिको अध्यक्ष बन्नको लागि यो पटक वरिष्ठ उपाध्यक्षमा त्रिपक्षीय प्रतिस्पर्धा हुन लागेको छ । 

अहिलेका एसोसियट उपाध्यक्ष रामचन्द्र संघाईले वरिष्ठ उपाध्यक्षमा उमेदवारी दिएका छन् ।  व्यावसायिक घराना त्रिवेणी ग्रुपका संघाईसँग बाह्रखरीका लागि आशीष ज्ञवालीले गरेको कुराकानी :

वरिष्ठ उपाध्यक्षमा तपाईँको उमेदवारी के लागि हो ? 

म अहिले उद्योग वाणिज्य महासंघमा एसोसिएट उपाध्यक्ष छु ।  एसोसियट उपाध्यक्षमा गरेको कामको आधारमा मैले वरिष्ठ उपाध्यक्षमा लड्ने विचार गरेको हो । 

मेरो उमेदवारीको तीनवटा एजेन्डा रहेको छ ।  यसमा महासंघको संगठनात्मक सुधार, महासंघको प्रदेश संरचनालाई बलियो बनाउने हो । 

जिल्ला नगरबाट आउने साथीहरुको समस्यादेखि लिएर ठूला तथा साना मझौला सबै व्यवसायीको समस्यालाई समाधान गर्न सरकारसँग पहल गर्ने मैले गर्नेछु । 

म आफैं पनि उत्पादनमुलक क्षेत्रमा काम गरेको उद्योगी हो ।  यसबाहेक हाम्रो लगानी सेवामुलक क्षेत्रमा समेत रहेको छ । 

कृषि उद्यममासमेत हामीले काम गरेका छौं ।  करिब २० हजारलाई हाम्रो समूहले रोजगारी दिएको छ ।  देशमा रोजगारी बढाउन, उत्पादनमुलक उद्योग बढाएर देशमा समृद्धिलाई अगाडि बढाउने हो ।  अहिलेका अध्यक्ष शेखर गोल्छाले ल्याउनुभएको भिजन २०३० पेपरलाई कार्यान्वयन पक्षमा लैजाने काम मेरो हो । 

चुनावका जिल्लामासमेत जानुभयो । अहिले जिल्लाबाट व्यवसायीहरु महासंघको निर्वाचनको लागि काठमाडौं आएका छन् । व्यवसायीको समस्या के रहेछ ? 

अहिले व्यवसायीहरुको समस्या आर्थिक मन्दीले पारेको असर हो । विश्वभर नै आर्थिक मन्दी छ यसको असर समेत नेपालमा परेको हो । 

यसमा नेपाल पनि अछुतो छैन । नेपालमा पनि यो समस्या भएको छ ।  अहिले सबैभन्दा बढी गाह्रो उद्योगी व्यवसायीलाई सबैभन्दा बढी समस्या बैंकको ब्याजदरले गर्दा भएको छ । 

बैंकको ब्याजदर बढ्दा उद्यमी व्यवसायीलाई समस्या भएको छ ।  आर्थिक मन्दीले गर्दा व्यापारमा संकुचन आएको छ ।  व्यापार घटेको र ब्याजदर बढ्दा व्यवसायीलाई दोहोरो मर्का परेको छ । 

बैंकको ब्याजदर बैंक सञ्चालकले बढी नाफा लिन खोजेको कारण बढेको आरोप छ । तपाईँ आफैं बैंकमा राम्रो सेयर स्वामित्व छ । सञ्चालक समेत हुनुहुन्छ । तपाईँहरुले ब्याजदर घटाए घट्ने होइन र ?

बैंकको ब्याजदर बढ्ने घट्ने भनेको खुला बजार अर्थतन्त्र अनुसार हुन्छ । बैंक सञ्चालकले चाहेर ब्याजदर बढ्ने घट्ने हुँदैन ।

बैंकको सञ्चालकको हिसाबले भन्नुपर्दा बैंक सञ्चालन राष्ट्र बैंकले बनाएको नीति नियममा रहेर हुने हो । बैंकको ब्याजदरको प्रभाव म आफैंलाई पनि परेको छ । 

व्यवसायीको गुनासो बैंक सञ्चालक महासंघमा हाबी हुँदा मुद्दा उठाउन कमजोर भयो भन्ने छ नि ?

त्यस्तो मलाई लाग्दैन । चुनावी कारणले पनि भनेको हो । हामी सबैजना बैंकसँग जोडिएका छन् । बैंक भनेको बैंक सञ्चालक लगानीकर्ता र कर्मचारीको मात्र होइन । 

बैंकमा पैसा जम्मा गर्ने निक्षेपकर्ताको पनि हो ।  ऋण लिनेको पनि बैंक हो । मेरो एउटा लगानी बैंकमा छ ।  तर त्योभन्दा बढी लगानी त निक्षेपकर्ताको छ । 

बैंकसँग कुनै कुनै हिसाबले सबै जोडिएको हुँदा मुद्दा उठान कमजोर भयो भन्ने म मान्दिन । 

महासंघको के आकर्षण छ । योपटक त तीनजना निर्वाचनमा प्रतिस्पर्धा गर्न लाग्नु भएको छ ?

व्यवसायीहरु आबद्ध हुने भनेको निजी क्षेत्रको संस्थामा हो । यसमा महासंघ सबैभन्दा ठूलो संस्था हो ।  म आफैं पनि एसोसिएट उपाध्यक्षको रुपमा कार्यकाल बिताएपछि स्वाभाविकरुपले वरिष्ठ उपाध्यक्षमा लड्न लागेको हो । 

जिल्लाको सानो व्यवसायीदेखि लिएर अर्बको कारोबार गर्ने बहुराष्ट्रिय कम्पनीसमेत महासंघमा आबद्ध छन् । 

देशभरका साना, मझौला ठूला सबै खाले व्यवसायीको आवाज महासंघले बोक्ने गर्छ ।  त्यो हिसाबले आकर्षण हुने नै भयो । त्यो भएर म आफू नेतृत्त्व लिन अगाडि सरेको छ । 

उद्योग व्यवसायलाई कसरी अगाडि बढाउन सकिन्छ । रोजगारी सिर्जना गर्न सकिन्छ भनेर म आफैं नेतृत्वमा आउन लागेको हो । 

त्रिपक्षीय प्रतिस्पर्धाको कारण पहिलो चरणमा नतिजा नआउने अनुमान छ । यसो भयो भने अर्कोपक्षसँग सहकार्य हुने सम्भावना कत्तिको हुन्छ ?

मलाई म पहिलो चरणमा नै निर्वाचन जित्छु भन्ने लाग्छ ।  पहिलो चरणमा जित्न सकेन भने दोस्रो चरणमा जित्छु ।  पहिलो चरणको नतिजा आएन भने स्वाभाविक रुपमा कोहीसँग सहकार्य हुन्छ । 

चन्द्र ढकालले सहमतिको प्रयास गर्नु भएको छ । सहमति हुने कत्तिको सम्भावना छ ?

त्यो म अहिले भन्न सक्ने अवस्थामा छैन । चन्द्रजीले एउटा बैठकमा बोलाउनु भएको थियो । त्यसपछि बैठक भएको छैन ।  म अहिले त्यसमा केही भन्न सक्ने स्थितिमा छैन । 

तपाईँको कारण निर्वाचनको थप भड्किलो भन्ने आरोप छ । के खर्च अत्यधिक बढानु भएको हो ?

मैले त्यस्तो खालको भड्किलो गरेको गरेको जस्तो लागेको छैन ।  यही अन्तर्वार्तासमेत एउटा पार्टी प्यालेसमा बसेर तपाईँलाई दिइरहेको छु । म साधारण किसिमले चुनावी अभियान सञ्चालन गरेको छु ।  मैले पाँचतारे होटलमा त्यसरी पार्टी दिने काम गरेको छैन । मेरो सम्पर्क कार्यालयसमेत कार्यालयमा चलेको थियो । 

अहिलेमात्र पार्टी प्यालेसमा साथीहरुसँग भेटघाटको लागि आएको हो । भनेपछि मैले कसरी खर्च बढाएँ ?

निर्वाचनमा कत्ति खर्च गर्दैै हुनुहुन्छ ?

निर्वाचन उठेपछि सामान्य खर्च हुन्छ । साथीहरुसँग भेटघाटमा । बाहिर हल्ला गरेजस्तो खर्च हुँदैन । 

राजनीति दलको समर्थन लिन के गर्दै हुनुहुन्छ । समर्थन कसले दिने भए ?

महासंघलाई राजनीतिबाट टाढा नै राख्नुपर्छ । बाहिर सञ्चारमाध्यममा मैले राजनीतिक पार्टीको समर्थन जुटाए भन्ने कुरामा सत्यता छैन ।

उद्योगी व्यापारीको हिसाबले सबै राजनीतिक दलसँग मिलेर जानुपर्ने हुन्छ ।  त्यो हिसाबले सबै राजनीतिक दलसँग सम्बन्ध हुन्छ । 

तर निर्वाचनको लागि लबिइङ गर्न नेताको गएको छैन ।  त्रिवेणी ग्रुप ठूलो व्यवसायिक घरानामा पर्छ । तपाईँले कसरी साना व्यवसायीको मुद्दालाई महासंघबाट सम्बोधन गर्नुहुन्छ । 

मलाई ठूलो व्यवसायिक घराना भने पनि हाम्रो ग्रुपले स्टार्टअप बिजनेशदेखि साना बिजनेश, मझौला उद्योग व्यवसाय चलाएका छौं । 

त्यो हिसाबले मलाई साना उद्योगी व्यवसायीको समस्याको बारेमा समेत जानकारी छ ।  सानो व्यवसायलाई मझौला हुँदै ठूलो बनाउँदै लग्ने हो ।  मेरो काम साना व्यवसायीलाई ठूलो बनाउनको लागि काम गर्ने हो । 

म त्यसैको लागि काम गर्ने हो । हाम्रो ग्रुपको व्यवसाय समेत सानोबाट सुरु हुँदै अहिलेको ठाउँमा आएको हो । एकैपटक ठूलो भएको होइन । 

महासंघ ‘चुनावदेखि चुनावसम्म’को संस्थामात्र हुँदा व्यावसायिक एजेन्डा ओझेलमा परेको होइन ?

लोकतन्त्रमा निर्वाचन हुनु राम्रो हो । म आफैं पनि एसोसिएट उपाध्यक्षको रुपमा बसेर काम गरेँ ।  महासंघमा निर्वाचनमात्र हुँदैन कामसमेत भएको छ । 

अहिलेका अध्यक्ष शेखर गोल्छाको नेतृत्त्वमा धेरै काम भएको छ ।  भिजन पेपर २०३० कसरी आउने थियो । ब्याजदरको कुरामा महासंघले आफ्ना सदस्यहरुको हितको लागि जहिले पनि माग राखेको छ । 

तीनवटा अर्थमन्त्री त म आफैंले हेरेँ ।  महासंघले हरेक अर्थमन्त्रीसँग व्यवसायीको हकहितको मात्र कुरा उठाएको छ । 

महासंघको नेतृत्वमा जानेले सरकारसँग बसेर लाइसेन्समा फाइदा लिनेमात्र काम गरे । जसले गर्दा मुद्दा ओझेलमा परेको आरोप व्यवसायीको छ ? तपाईँ नेतृत्वमा जादैं गर्दा व्यक्तिगत फाइदा लिने काम गर्दिन भन्न सक्नुहुन्छ ?

अहिलेको नेतृत्व हामीले पाएका छौँ । त्यसले के लाइसेन्सको फाइदा लियो ।  मलाई त नेतृत्वले लाइसेन्सको फाइदा लिएको जस्तो लाग्दैन । 

नेतृत्व लिएर लाइसेन्सको फाइदा लिनुपर्ने छैन ।  म आफु २० वर्षदेखि महासंघको कार्यसमितिमा छु ।  हामी सबै निर्वाचन लडेका छौँ । व्यवसाय गर्न पाउने त हक हो । व्यक्तिगत फाइदाको लागि त म महासंघमा जान लागेको होइन । 

त्यसो हो भने रामचन्द्र संघाईलाई किन भोट दिने ?

रामचन्द्र संघाईलाई देशभरका जिल्ला, एसोसिएट र वस्तुगतका साथीहरुले मलाई विश्वास गर्नुहुन्छ ।  मेरो उद्योग व्यवसायको जीडीपीमा २ प्रतिशतको योगदान छ । 

मेरो वरिष्ठ उपाध्यक्षको रुपमा काम चन्द्र ढकालजीको कार्यकाललाई सफल बनाउने हो । शेखरजीको अधुरो रहेको कामलाई समेत अगाडि बढाउने हो । 

साथीहरुको समस्या मेरो आफ्नो भनेर लाग्ने छु । म कसैलाई निरास हुन दिने छैन ।