काठमाडौं । हाल देशका धेरै स्थानमा वर्षा भइरहेको छ । मौसम पूर्वानुमान महाशाखाका अनुसार कोसी प्रदेश, मधेस प्रदेश, वाग्मती प्रदेश, गण्डकी प्रदेशलगायत स्थानमा वर्षा भइरहेको छ ।

पछिल्लो एक घण्टायता सप्तरीको फत्तेपुरमा सबैभन्दा बढी वर्षा भएको महाशाखाकी मौसमविद् प्रतिभा मानन्धरले जानकारी दिइन् । यो अवधिमा त्यहाँ ३० मिलिमिटर वर्षा मापन गरिएको छ ।

यस्तै, पछिल्लो एक घण्टायता मकवानपुरको भोर्लिनीमा १५ र संखुवासभाको तुम्लिङटारमा १० मिलिमिटर वर्षा मापन गरिएको उनले बताइन् ।

अहिले काठमाडौंमा पनि वर्षा भइरहेको छ । वर्षा गराउने प्रणाली पश्चिमतर्फबाट सर्दै पूर्वतिर गइरहेको उनले जानकारी दिइन् ।

“वर्षा गराउने बादल/प्रणाली नै अहिले काठमाडौंमाथि छ । पश्चिमबाट यो सर्दै पूर्वतिर जाँदै छ,” उनले बाह्रखरीसित भनिन्, “अहिले विशेष गरी पूर्व र काठमाडौंमा वर्षा भइरहेको छ । तर, मौसम बदली देशभर नै छ ।”

काठमाडौंमा अब करिब दुई घण्टा वर्षा हुने सम्भावना छ । त्यसपछि केही समय रोकिए पनि राति पुनः पानी पर्न सक्ने मौसमविद् मानन्धरले बताइन् ।

“काठमाडौंमा अब करिब दुई घण्टा वर्षा हुने सम्भावना छ । त्यसपछि पानी पर्न कम हुँदै जान्छ । केही बेर रोकिए पनि राति पुनः पानी पर्ने देखिन्छ,” उनले भनिन् ।

उनका अनुसार आजभन्दा भोलि मौसममा सुधार हुनेछ । भोलिभन्दा पर्सि मौसममा सुधार आउने उनले बताइन् ।