पछिल्लो एक महिना उत्साहजनक प्रदर्शन गरिरहेको नेपाली क्रिकेट टोलीले बिहीवार घरेलु मैदानमा युनाइटेड अरब इमिरेट्सलाई ‘डकवर्थ लुइस‘ पद्धतिमा हराउँदै आईसीसी क्रिकेट विश्वकप लिग–२ को शीर्ष तीनमा रहन सफल भएको छ । यस जितसँगै नेपालले जिम्बाब्वेमा १८ जुनदेखी ९ जुलाईसम्म हुने एकदिवसीय विश्वकप–२०२३ को छनोट प्रतियोगितामा स्थान बनाएको छ । 

एक महिनाअघिको नेपाली क्रिकेटको अवस्था हेर्दा नेपालले शीर्ष तीन होइन, आईसीसी एकदिवसीय अन्तर्राष्ट्रिय मान्यता पनि जोगाउन सक्दैन कि जस्तो लाग्थ्यो । तर, भारतीय प्रशिक्षक मोन्टी देसाईले नेपालको प्रशिक्षण सम्हालेपछि टिमको प्रदर्शनमा नाटकीय परिवर्तन आयो । 

क्यानडाका पूर्वमुख्यप्रशिक्षक तथा वेष्ट इन्डिजका पूर्व ब्याटिङ प्रशिक्षक देसाईले ३८ दिनअघि नेपाली टोलीको जिम्मेवारी सम्हालेपछि खेलेका १२ मध्ये ११ खेल नेपालले जितेको छ । त्यही सफलताबाट नेपालले आगामी चार वर्षका लागि एकदिवसीय अन्तर्राष्ट्रिय मान्यता त जोगायो नै आईसीसी क्रिकेट विश्वकप लिग–२ को शीर्ष तीनमा रहेर जिम्बाब्वेको यात्रा पनि पक्का गर्यो । यस प्रतियोगिताबाट स्कटल्यान्ड र ओमानले यसअघि नै विश्वकप छनोट प्रतियोगितामा स्थान पक्का गरिसकेका छन् । 

नामिबिया, पपुवा न्युगिनी (पीएनजी), अमेरिका र यूएईले अब नामिबियामा २४ मार्चदेखी ४ अप्रिलसम्म हुने आईसीसी क्रिकेट विश्वकप क्वालिफायर प्लेअफ खेल्नेछन् । जहाँ आईसीसी क्रिकेट विश्वकप च्यालेन्ज लिगबाट क्यानडा र जर्सी थपिनेछन् । ६ टिमले प्रतिस्पर्धा गर्ने प्लेअफबाट शीर्ष दुई टिम पनि जिम्बाब्वेमा हुने छनोट प्रतियोगितामा समावेश हुनेछन् । 

जिम्बाब्वेमा हुने उक्त आईसीसी विश्वकप छनोट प्रतियोगितामा क्रिकेट विश्वकप सुपर लिगको पुछारमा रहने पाँच टिम पनि हुनेछन् । सुपर लिगमा आईसीसी १२ पूर्ण सदस्य र आईसीसी क्रिकेट विश्वकप लिग च्याम्पियन बनेको नेदरल्यान्ड्सले प्रतिस्पर्धा गरिरहेका छन् । त्यसबाट जिम्बाब्वे र नेदरल्यान्ड्स तल झर्ने पक्का छ । अन्य टिमको टुंगो लाग्न बाँकी छ । 

विश्वकप छनोट प्रतियोगिताबाट शीर्ष दुई टिमले भारतमा आगामी अक्टोबर नोभेम्बरमा हुने एकदिवसीय विश्वकपमा स्थान पक्का गर्नेछन् । 

नेपाल पछिल्लो १२ मध्ये एक खेलमा मात्र पराजित भयो । उक्त एक हार २ मार्चमा दुबई अन्तर्राष्ट्रिय क्रिकेट मैदानमा सम्पन्न यूएईविरुद्ध ६८ को हार थियो । त्यसबाहेक नेपाल सबै खेलमा विजयी रह्यो । 

बिहीबार कीर्तिपुरस्थित त्रिवि क्रिकेट मैदानमा नेपालले टस हारेको थियो । टस जितेर ब्याटिङमा आएको युएईले निर्धारित ५० ओभरमा ६ विकेट गुमाएर ३१० रन बनाएको थियो । ३११ रनको लक्ष्य नेपालका लागि सहज थिएन । त्यसमाथि नेपालले सुरुमै तीन विकेट गुमायो । आसिफ शेख, कुशल मल्ल र कप्तान रोहितकुमार पौडेलले लामो इनिङ्स खेल्न सकेनन् । 

रोहित ६.५ ओभरमा आउट हुँदा नेपाल ३७÷३ को स्थितिमा थियो । त्यहाँबाट कुशल भुर्तेल र भीम सार्कीले नेपालको इनिङ्स सम्हाले । दुईले चौथो विकेटका लागि ६१ रनको साझेदारी गरे । कुशल ५० रन बनाएर आउट भएपछि युवा खेलाडी भीमले महत्त्वपूर्ण इनिङ्स खेले । उनले आरिफ शेखसँग पाँचौँ विकेटका लागि ८३ रनको साझेदारी गरे । भीम आफैँ ६७ रन बनाएर पवेलियन फर्किए । 

त्यसपछि आरिफले गुल्सन झासँग ४४ रनको साझेदारी गरे । आरिफ ५२ रन बनाएर पवेलियन फर्किए । दिन ढल्कदै थियो । वर्षाको सम्भावना पनि बढ्दो थियो । त्यस्तो अवस्थामा खेलको नतिजा डकवर्थ लुइस पद्धतिबाट आउने पक्का थियो । डकवर्थ लुइस पद्धतिमा गए नतिजा नेपालको पक्षमा थिएन । क्रिजमा गुल्सन र दीपेन्द्रसिंह ऐरी थिए । 

गुल्सनले ४२औं ओभरको तेस्रो बलमा छक्का प्रहार गरे । त्यसपछि लगातार तीन बलमा चौका हानेपछि नेपालको दबाब कम भयो । डकवर्थ लुइस पद्धतिमा गए पनि नेपालको जित पक्का भयो । त्यस हिसाबमा गुल्सन आजको खेलमा नायक बने । ४४ ओभर सकिँदा खेल खेल्न सम्भव भएन । डर्कवर्थ लुइस पद्धतिमा नेपाल ९ रनले विजयी भयो । 

खेल सम्भव नभए पनि यूएईका खेलाडीले अझै खेल्नुपर्ने माग गरेका थिए । उनीहरूलाई नतिजा आफ्नो पक्षमा ल्याउने आशा थियो । तर, अम्पायरले खेल सम्भव नभएको सुनाएपछि यूएईका खेलाडी निराश भएका थिए । उनीहरूले त्यसमा आक्रोश पनि पोखे । 

अन्तिम क्षणजस्तो बने पनि नतिजा नेपालको पक्षमा आइसकेको थियो । नेपालको जिम्बाब्वे यात्रा तय भइसकेको थियो । नेपालको यो यात्रामा अनेक संयोग हुन सक्छन् । तर, यसको पहिलो श्रेय मुख्य प्रशिक्षक देसाईलाई जान्छ । जसले टिमलाई एकजुट र एकताबद्ध बनाई खेलाडीको मनोबल उच्च बनाए । अनि खेल जिताए । 

देसाई सारथी थिए । मैदानमा उत्रेका खेलाडीको प्रदर्शनविना सबै असम्भव थियो । त्यसकारण यो ऐतिहासिक यात्राको नायक खेलाडी हुन् । उनीहरू लाखौं समर्थकको अनुहारमा खुसी ल्याउने मुख्य पात्र हुन् । बधाई छ सबै नेपाली खेलाडीलाई । आगामी खेलको शुभकामना ।

राजनीतिक अन्योल र आर्थिक निराशाका बीचमा नेपाली जनताले खुसी हुने मौका पाए । यसका लागि खेलाडी र मुख्यप्रशिक्षकलगायत सम्बद्ध सबै धन्यवादका पात्र भएका छन् । यसले पुनः क्रिकेटलगायत सम्भावना भएका खेलमा राज्यले लगानी र सुविधा बढाउनु उचित हुने पुष्टि भएको छ । खेलाडीको मनोबल उकास्न उपयुक्त उपायहरु अपनाउन सरकार पनि अगाडि सरोस् ।