वासिङ्टन । अमेरिकी राष्ट्रपति जो बाइडेनले युक्रेनमा एफ–१६ लडाकु जेट विमान पठाउन अस्वीकार गरेका छन् । यद्यपि युक्रेनी अधिकारीहरूले तत्काल हवाई प्रतिरक्षा सहयोगका लागि फेरि आग्रह गरेका छन् ।
सोमबार एकजना पत्रकारले सोधेको 'के अमेरिकाले युक्रेनलाई विमानहरू उपलब्ध गराउँछ ?' भन्ने प्रश्नमा बाइडेनको जवाफ थियो– नाइँ ।
जर्मनीका एकजना नेताले पनि युक्रेनमा लडाकु जेट विमान नपठाइने बताएको भोलिपल्ट बाइडेनको टिप्पणी बाहिरिएको हो ।
लामो समयदेखि युक्रेनले रुससँग जारी रहेको युद्धको दौरान किभलाई आफ्नो वायुक्षेत्र माथि नियन्त्रण लिन सहयोग पुर्याउन अत्याधुनिक लडाकु विमान दिन आफ्नो गठबन्धन माथि दबाब दिँदै आएको छ ।
युक्रेनी राष्ट्रपति भालोदिमिर जेलेन्स्की र युक्रेनका वरिष्ठ सैनिक अधिकारीहरूले सैन्य सहयोग प्रतिबन्धित नरहेको बताउने गरेका छन् ।
तर अमेरिका र त्यसका साझेदारहरू युक्रेनलाई लडाकु विमान उपलब्ध गरायँदा आणविक शक्ति सम्पन्न राष्ट्र रुससँगको सम्बन्ध थप तनावपूर्ण हुने भयमा छन् । सोभियत युगकालीन अधिकांश मिग लडाकु विमानका तुलनामा अमेरिकामा निर्मित एफ–१६ महत्त्वपूर्ण ढंगले परिमार्जित मानिन्छ ।
युक्रेनले अहिले सन् १९९१ मा सोभियत संघबाट स्वाधिनता हासिल गर्दाको समयका मिग लडाकु विमानहरू प्रयोग गरिरहेको छ ।
जेट विमानका लागि युक्रेनले गरेको अनुरोधलाई बारम्बार अस्वीकार गरिसकेका बाइडेनले अमेरिकाले विमानको सट्टा अन्य क्षेत्रमा सैनिक सहयोग गर्नेबारे ध्यान केन्द्रित गरिरहेको पनि बताएका छन् ।
बीबीसीबाट ।
-1749010126.jpg)
