काठमाडौं । दिनेश प्रजापति र रमेश अधिकारी सूर्य नेपाल गल्फ टुर २०२२–२३ अन्तर्गत सिजनको तेस्रो प्रतियोगिता सूर्य नेपाल एनपीजीए म्याच प्लेको उपाधिका लागि भिड्ने भएका छन् ।
रोयल नेपाल गल्फ क्लबमा भएको सेमिफाइनलमा १३ औँ वरीयताका रमेश अधिकारीले १० औँ वरीयताका भुवन कुमार रोक्कालाई २/१ ले हराउँदै फाइनलमा स्थान सुरक्षित गरे । यसैगरी अर्को सेमीफाइनलमा सातौँ वरीयताका दिनेश प्रजापतिले आठौँ वरीयताका धनबहादुर थापालाई २/१ ले नै माथ दिएर फाइनलको यात्रा तय गरे । सूर्य नेपाल टुरमा करियरकै पहिलो उपाधि जित्ने दाउमा रहेका दिनेश अब मात्र एक जित टाढा रहेका छन् ।
दिनेश र रमेशले उपाधिका लागि भोलि ३६–होलको प्रतिस्पर्धा गर्नेछन् भने धन र भुवनले तेस्रो स्थानका लागि १८ होलको खेल खेल्नेछन् ।
यसअघि आजै भएको क्वाटरफाइनलमा अप्रत्याशित नतिजा आएका छन् । जहाँ नेपाल नम्बर एक खेलाडी शुक्रबहादुर राई, दोस्रो वरीयताका भुवन नगरकोटी, तेस्रो वरीयताका जयराम श्रेष्ठ र पाँचौ वरीयताका रवि खड्का पराजित भए ।
शुक्रलाई वरीयताको १० औँ स्थानमा रहेका भुवन कुमार रोक्काले ३/१ ले माथ दिए । अर्को क्वाटरफाइनलमा धनबहादुर थापाले भुवनलाई ३/२ ले हराउदै अन्तिम चारमा स्थान बनाएका थिए । यसैगरी दिनेश प्रजापतिले तेस्रो वरीयताका जयराम श्रेष्ठलाई ३/२ ले हराए । पूर्व नम्बर एक खेलाडी रवि खड्काको चुनौती १३ औँ वरीयताका रमेश अधिकारीले समाप्त पारिदिए । रमेशले पाँचौ वरीयताका रविलाई ३/२ को नतिजामा पाखा लगाए ।
गत सिजनको उत्कृष्ट १६ प्रोफेसनल गल्फरले प्रतियोगितामा भाग लिने भएतापनि चार खेलाडी देश बाहिर रहेकाले उत्कृष्ट २० सम्मका खेलाडीले मौका पाएका हुन् । सूर्य नेपाल प्रालिको प्रायोजनमा पीजीए नेपालले आयोजना गरेको प्रतियोगिताको कुल पुरस्कार राशि दुई लाख ५० हजार रहेको छ ।
विजेता खेलाडीले ६० हजार रुपैयाँ प्राप्त गर्नेछन् भने उपविजेताले ४२ हजार पाउँनेछन् । तेस्रो र चौँथो हुने प्रोले क्रमशः ३२ हजार र २४ हजार प्राप्त गर्नेछन् । क्वाटरफाइनलमा पराजित हुने चार खेलाडीले समान ११ हजार प्राप्त गर्नेछन् र पहिलो चरणबाट बाहिरिने आठ खेलाडीले समान ६ हजार प्राप्त गर्नेछन् ।