बुटवल । लुम्बिनी प्रदेशमा आज मुख्यमन्त्री लगायत अन्य मन्त्रीको पद तथा गोपनीयताको शपथसँगै सानो आकारमा मन्त्रिमण्डल गठनको तयारीमा दलहरु जुटेका छन् । तर, माओवादीको बटम लाइनमा अर्थ र पर्यटन ग्रामीण तथा सहरी विकास मन्त्रालय रहेका छन् । यी दुई मन्त्रालयको टुङ्गो नलाग्दासम्म माओवादीले पद तथा गोपनीयताको शपथ नलिने घोषणा गरेको छ ।

प्रदेश प्रमुखको कार्यालयले लुम्बिनी प्रदेशसभा परिसर राप्ती उपत्यका देउखुरीमा दिउँसो १ बजे पद तथा गोपनीयताको शपथ ग्रहण कार्यक्रम राखेको छ । भोलि नै ३ देखि ५ सदस्यीय मन्त्रिपरिषद् गठनको तयारीमा दलहरु जुटेका छन् । एमाले, माओवादीको सहभागितामा सानो आकारमा मन्त्रिपरिषद् बनाउने तयारी गरेको नवनियुक्त मुख्यमन्त्री लिला गिरीले बताए । बाँकी दलका लागि भने सत्ता गठबन्धनभित्र छलफल चलिरहेको गिरिले जानकारी दिए । 

बुधबार हुने शपथ ग्रहणमा एमाले संसदीय दलका नेता तथा नवनियुक्त मुख्यमन्त्री लिला गिरीसहित उपनेता चेतनारायण आचार्य र माओवादीबाट दलका नेता जोखबहादुर महरा र ईन्द्रजीत थारुलगायत अन्य दलबाट एकजनाले शपथ लिने तयारी भएको माओवादीको स्रोतले बताएको छ ।

सत्तारुढ दल नेकपा माओवादी केन्द्रका संसदीय दलका नेता जोखबहादुर महराले पनि मुख्यमन्त्रीको दाबी गरेका थिए । दाबी अनुसारको पहिलो नेतृत्व नपाए पछि महरा लुम्बिनी सरकारलाई समर्थन नगर्ने जनाए पछि केपी ओली र प्रचण्डबीच विशेष सहमति भएको छ । सहमति अनुसार पहिलो नेतृत्व अढाई वर्ष एमाले र दोस्रो नेतृत्व अढाई वर्ष माओवादीले आलोपालो सरकारको नेतृत्व गर्नेगरी सहमति भएको महराले बताए ।

मुख्यमन्त्री र सभामुखमा केन्द्रीय निणर्यलाई समर्थन जनाए पनि मुख्यमन्त्रीमा एमालेले पहिलो नेतृत्व लिएपछि माओवादीले अर्थ मन्त्रालय र पर्यटन ग्रामीण तथा सहरी विकास मन्त्रालय पाउनु पर्ने दाबी गरेको छ । अर्थ मन्त्रालयमा जोखबहादुर महरा र पर्यटन ग्रामीण तथा सहरी विकास मन्त्रालयमा ईन्द्रजीत थारु र बाँकी  एक मन्त्रालयमा कृष्णा केसीले लिने दाबी गरेका छन् । यी दुई मन्त्रालय र अन्य एक गरी तीन मन्त्रालय टुङ्गो नलाग्दासम्म माओवादीले शपथ ग्रहण नगर्ने माओवादीको स्रोतले बतायो ।