काठमाडौं । कतार विश्वकपमा पहिलो चरणका खेल सकिँदा अफ्रिकी महाद्वीपका देशहरू जितविहीन बनेका छन् । अफ्रिकाबाट पाँच राष्ट्रले विश्वकप २०२२ मा प्रतिस्पर्धा गरिरहेका छन् । घानाले दुई गोल गर्नुबाहेक अरू देशले गोल पनि गर्न सकेका छैनन् ।
तुलनात्मक रूपमा कमजोर मानिएका एसियाली राष्ट्र साउदी अरब र जापानले प्रतियोगिताका बलिया राष्ट्रलाई स्तब्ध बनाए । तर, अफ्रिकाका दुई टिमले एक/एक अंक जोड्नुबाहेक बाँकी तीन पराजित भएका छन् ।
अफ्रिकाबाट बलियो मानिएको सेनेगल, क्यामरुन, घाना पराजित हुँदा मोरक्को र ट्युनिसियाले अंक बटुल्न सफल भएका छन् । मोरक्को र ट्युनिसियाको खेलमा समर्थकहरू पनि रंगशालामा भरिभराउ थिए । दुवै देशबाट गल्फ राष्ट्रमा कामका लागि जानेको संख्या धेरै छ । मोरक्को र ट्युनिसिया दुवैले अपेक्षा गरिएभन्दा राम्रो प्रदर्शन गर्न सफल भए ।
ट्युनिसियाले मंगलबार डेनमार्कलाई गोलरहित बराबरीमा रोकेको थियो । मोरक्कोले गत संस्करणको उपविजेता क्रोएसियासँग गोलरहित बराबरी खेलेको थियो । ट्युनिसिया समूह ‘डी’को दोस्रो स्थानमा छ । मोरक्को समूह ‘एफ’को तेस्रो स्थानमा छ ।
क्यामरुन स्वीट्जरल्यान्डसँग १–० ले पराजित भयो । स्वीट्जरल्यान्डको जितमा क्यामरुनमै जन्मिएका ब्रेड इम्बोलोले गोल गरेका थिए । घाना पोर्चुगलसँग ३–२ ले पराजित भयो । अफ्रिकन कप अफ नेसन्स विजेता सेनेगल डेनमार्कसँग २–० ले हार्यो ।
रुसमा सम्पन्न सन् २०१८ को विश्वकपमा सबै अफ्रिकी राष्ट्र समूह चरणबाटै बाहिरिएका थिए ।
“हामी अझै दृढ छौँ । किनभने, हामीलाई थाहा छ कि यस विश्वकपमा अझै पनि सफलता हासिल गर्न सक्छौँ । हामी अझै पनि हाम्रा सम्भावनाहरूमा विश्वास गर्छौँ,’’ सेनेगलका कप्तान कालिल्डाउ कोउलिबालीले शुक्रबार आयोजक कतारविरुद्धको खेलअघि भने ।
कतार एसियाली च्याम्पियन भए पनि पहिलो खेलमा इक्वेडरसँग २–० ले पराजित भएको थियो । तर, जापान र साउदी अरबको नतिजाले कतारको हारलाई छायामा पारिदियो । जापानले जर्मनीलाई तथा साउदीले अर्जेन्टिनालाई समान २–१ को नतिजामा पराजित गरेका थिए ।