विराटनगर । मोरङको निर्वाचन क्षेत्र नम्बर २ अन्तर्गत पर्ने सुनवर्षी नगरपालिकाको झपरतलचौकमा चुनावी कार्यक्रम चल्दै थियो । दलका केही कार्यकर्ता आफ्ना उमेदवारको पक्षमा 'जिन्दावाद'का नारा लगाउँदै थिए । तर, मन्टाला राजवंशी र उनका साथीहरू भने कोणसभामा नगइ नजिकैको चिया पसलबाट कार्यक्रम हेर्दै थिए । 

“कार्यक्रममा किन नजानु भएको ?” बाह्रखरी संवाददाताले प्रश्न सोध्नासाथ भने, “नेता सबै उस्तै हुन्, दल पनि त्यस्तै छन्, चुनावका बेला आउँछन, जितेर जान्छन्, उनीहरूकै आसेपासे र टाठाबाठाले मात्र सुविधा लिन्छन्, गाउँको विकासमा ध्यान दिँदैनन् ।”

मन्टालालको भनाइलाई शेषराज राजवंशीले पनि समर्थन गरे । “यहीँ हामीले अनन्त मन्दिरको अधुरो काम पूरा गराइदिन स्थानीय सरकार गुहार्‍याैँ तर पालिका प्रमुखले हामीलाई वास्तै गरेनन्, उनका सहयोगीले त्यही बजेट अन्यत्रै लगेछन्,” उनले सुनाए । 

दलका कार्यक्रममा स्थानीय सहभागिता भन्दा पनि बढी आयातित कार्यकर्ताको चाप देखिने गरेको सर्वसाधारण मतदाताले बताउने गरेका छन् ।

झपरतलका सुरेश चौधरी भन्छन्, “जनताका समस्या नेता र जनप्रतिनिधिसमक्ष पुग्नै नदिने बीचका ठुटे नेताहरूको गिरोह नै छ, जसले नेता र जनताबीच दुरी कायम गरिदिएको छ ।” उनले यस्ता विषयमा नेताहरूसमेत सचेत हुनुपर्ने बताए । 

मीना राजवंशी सागसब्जीको व्यापार गर्छिन । तरकारी बाली लगाउन सधैँ मलखादको समस्या हुन्छ । “तर, चुनावमा बेला ठूलाठूला आश्वासन दिने नेता त्यसपछि बेपत्ता हुन्छन्,” राजवंशीले भनिन्, “यहाँ वडामा जिताएकाहरुले समेत हामीलाई वास्ता गर्दैनन् ।”

सुनसरीको गढी गाउँपालिकाको मधेलीमा एउटा चुनावी सभा चलिरहेको थियो । दुलर चौधरी परैबाट हेरिरहेकी थिइन् । उनी खेतमा धान काटेर थकाइ मेट्न सडकतिर उक्लिएकी थिइन् । चुनावी प्रचार गर्दै गरेका उमेदवार र गाडीका लस्कर पश्चिमतिर गइरहेका थिए ।

दुलरले बाह्रखरीसँग भनिन्, “हामी आफ्नै समस्या र व्यस्ततामा छौँ । उमेदवार आउँछन् । भोट लिन्छन् अनि जान्छन्, तर, जनताको समस्या बुझ्न फेरि आउँदैनन् ।” उनले यो पटक निकै विचार गरेर मात्र आफूले मत खसाल्ने निधो गरेको सुनाइन् ।

मधेलीकै लोधरी चौधरीको टोलमा सुकुम्बासीको निकै ठूलो समस्या छ । उनीहरूकाे लागि व्यवस्थित बस्ती बसाउन सके राम्रो हुने थियो । तर, सुकुम्बासीका समस्या समाधान गर्न चासो दिएको पाइँदैन ।

लोधरी भन्छिन्, “चुनावका बेला त नेताले अकाशका तारा धर्तीमै झार्नेसम्मका कुरा गर्छन्, तर, त्यसपछि पाँच वर्ष भाग्छन् ।” सोचविचार गरेर र अनि जनताको लागि काम गर्ने नेतालाई मात्र भोट दिनुपर्ने उनी बताउँछिन् ।