काठमाडौं । राष्ट्रिय प्रजातन्त्र पार्टी (राप्रपा) आफ्नो सरकार बने आगामी पाँच वर्षभित्र पुँजीबजारमा विदेशी संस्थागत लगानीकर्ताको अकर्षण बढाउन नीतिगत व्यवस्था गर्ने घोषणा गरेको छ । 

सोमबार ‘प्रतिनिधिसभा तथा प्रदेशसभा निर्वाचन २०७९’ को लागि पार्टीको घोषणापत्र सार्वजनिक गर्दै पुँजीबजारमा संस्थागत लगानीकर्तालाई आकर्षित गर्ने प्रतिबद्धता गरिएको हो ।

“पुँजीबजारमा साना, स्वदेशी तथा विदेशी संस्थागत लगानीकर्ताको आकर्षण बढाइनेछ,” घोषणापत्रमा लेखिएको छ ।

त्यस्तै, वैदेशिक लगानीसमेतलाई आकर्षित गर्न उद्योग दर्ता प्रक्रियालाई सरलीकरण गरी उद्योग व्यवसाय दर्तामा लाग्ने समय र लागत कम गरिने पनि प्रतिबद्धता जनाइएको छ । डिजिटल प्रणालीमार्फत सेवा प्रवाहलाई चुस्त बनाइने पनि प्रतिवद्धता गरिएको छ ।

रेमिट्यान्सलाई उत्पादनमूलक क्षेत्रमा प्रयोग गर्न प्रोत्साहित गरिने पनि घोषणापत्रमा उल्लेख छ ।  

त्यसैगरी समयमा नै विकास आयोजना सम्पन्न गर्ने स्थानीय तहलाई प्रोत्साहित गर्ने गरी दुई प्रतिशत बोनस सुविधा प्रदान गरिने पनि चुनावी घोषणापत्रमा उल्लेख छ ।