काठमाडौं । महोत्तरीकी कुमारी आमा निहारिका राजपुतले शुक्रबारदेखि पुनः आमरण अनसन बस्ने घोषणा गरेकी छन् ।

गृहमन्त्रालयसँग गरेको ५ बुँदे सहमति कार्यान्वयन गर्न दबाब दिन आफूले पुनः आमरण अनसन सुरु गर्ने घोषणा गरेको उनको भनाइ छ । 

गत जेठ २७ गते आमरण अनसन सुरु गरेर असार २७ गते अनसन तोडेकी राजपुतले आफ्नो माग पूरा नभएसम्म अनसन नतोड्ने चेतावनी समेत दिएकी छिन् ।

न्यायको माग गर्दै बच्चासहित अनसनमा बसेकी राजपुतले गृहमन्त्री बालकृष्ण खाँणको हातबाट जुस खाएर अनसन तोडेपनि आजसम्म कुनै पनि माग कार्यान्वयन नभएको गुनासो पोखिन् ।

उनले भनिन्, “मसँग सरकारले गरेका सहमति एउटा पनि कार्यान्वयन गरेको छैन, मन्त्रालयले मलाई झुटो आश्वासन दिएर अनसन तोड्न लगायो, भोलि (शुक्रबार)देखि सिंहदरबार अगाडि बच्चा लिएर आमरण अनसन फेरि सुरु गर्दैछु । कि त कुमारी आमालाई गरिखान दिनपर्‍याे कि त सरकारले मारिदिओस् । जतिपनि कुमारी आमाहरू छन्, उनीहरूले आफ्नो बच्चाको न्याय माग्न जाँदा मर्नैपर्छ भने मर्न दिनुहोस् कि त कित न्याय चाहियो ।”

पीडक शिवराम श्रेष्ठ र निहारिकाका छोराको डीएनए परीक्षणको कानुनी प्रक्रिया अघि बढाउन पहल गर्ने, अनसनकर्ताको आर्थिक सहायताका लागि गृहमन्त्रालयमार्फत पहल गर्ने, अनसनकर्ता र उनको छोराको सुरक्षा आवास व्यवस्थापनका लागि गृहमन्त्रालय र महिला, बालबालिका तथा ज्येष्ठ नागरिक मन्त्रालयमार्फत पहल गर्ने, न्याय राज्यका सम्पूर्ण निकाय पीडितमैत्री बनाउन पहल गर्ने लगायत राजपुत र सरकारबीच सहमति भएको थियो ।

सहमतिसँगै कुमारी आमा राजपुतले अनसन तोडेकी थिइन् ।