काठमाडौं । पाकिस्तानविरुद्धको दोस्रो टेष्टमा घरेलु टोली श्रीलंकाले तेस्रो दिन मंगलबार ३२३ रनको अग्रता लिन सफल भएको छ ।

दोस्रो इनिङ्स थालेको श्रीलंका तेस्रो दिन सकिँदा १७६/५ को स्थितिमा छ ।

श्रीलंकाको गल अन्तर्राष्ट्रिय क्रिकेट मैदानमा पाहुना टोली पाकिस्तानले १९१/७ को स्थितिबाट तेस्रो दिन थालेको थियो । पाकिस्तानका यासिर शाह १३ रन बनाए क्रिजमा थिए ।

पाकिस्तानले अघिल्लो दिनको स्कोरमा थप ४० रन जोड्दा बाँकी विकेट गुमायो । यासिर शाहले २६ रन बनाए । हसन अलीले २१ र नौमान अलीले एक रन जोडे ।

शाह र नोमान अलीलाई रमेश मेन्डिसले आउट गरे भने हसन अलीलाई प्रभाथ जयसूर्याले पवेलियनको बाटो देखाएका हुन् । 

पहिलो इनिङ्समा श्रीलंकाका मेन्डिसले ४७ रन दिएर ५ विकेट लिए । जयसूर्याले तीन विकेट लिए । 

तेस्रो दिन सकिँदा श्रीलंकाका दिमुथ करुणारत्ने २७ र धनन्जय डी सिल्भा ३० रन बनाएर क्रिजमा छन् ।

दोस्रो इनिङ्समा श्रीलंकाका एन्जेलो म्याथ्युजले ३५ र दिनेश चन्डीमलले २१ रन बनाए । ओशादा फर्नान्डाोले १९ रन बनाउँदा निरोशन दिकवेला र कुशल मेन्डिसले समान १५ रन बनाए । 

पाकिस्तानका नसीम शाहले दुई विकेट लिए भने यासिर शाह, मोहम्मद नवाज र अघा सलमानले एक एक विकेट लिए ।

श्रीलंकाले पहिलो इनिङ्समा ३७८ रन बनाएको थियो । पाकिस्तानले २३१ रन बनाएको थियो ।