बुटवल । रूपन्देहीको सियारी गाउँपालिका २ च्याङ्गठामा पशु हाटबजार सञ्चालनमा आएको छ । विश्व बैँकको पाँच करोड ऋण अनुदानमा तयार भएको हाटबजार सञ्चालनमा आएको हो ।

किसानलाई गाईभैँसीको बजारीकरणमा सहज बनाउने उद्देश्यले नेपाल लाइभस्टक सेक्टर इनोभेसन आयोजनाले हाटबजार निर्माण गरेको आयोजना प्रमुख गान्धीराज उपाध्यायले बताए । हाटबजारमा पशु चिकित्सकको पनि व्यवस्था गरिएको छ । जहाँ किसानले ल्याएका पशु चौपायाको निशुल्क उपचार हुने गाउँपालिकाका पशु शाखा प्रमुख गणेश खनालले जानकारी दिए ।

अत्याधुनिक पशु हाटबजारमा निशुल्क विशेषज्ञ चिकित्सकीय सेवा लिन पाइने भएपछि किसानहरू खुसी भएका छन् । हाटबजारमा पशु चौपाया बिक्री गर्दा उचित मूल्य पाइने र सहज रूपमा बिक्री गर्ने वातावरण तयार भएको किसानहरू बताउँछन् ।

हाटबजार सञ्चालनका लागि समिति गठन गरिएको छ । सियारी च्याङ्गठा पशु हाटबजार सञ्चालक समितिले साप्ताहिक हाटबजार अन्तरगत हरेक आइतबार बजार सञ्चालनमा ल्याउने गाउँपालिका अध्यक्ष थानेश्वर घिमिरेले बताए । हाट बजारमा पशुको स्वास्थ्य जाँच, तिनीहरुको खरिद बिक्री, दाना पानी खुवाउने व्यवस्था गरिएको छ । गाईभैँसी  बिक्री नभए केही दिनलाई होल्डिङ सेन्टरमा राख्न सकिन्छ ।

किसान तथा व्यापारीलाई खाजा, खाना र आराम गर्ने स्थल बनेको छ । पशु हाटबजारमा प्राविधिक र व्यवस्थापकीय सेवा गाउँपालिकाले गर्नेछ । उत्पादनशील गाईभैँसी र मासुकालागि पाडो, राँगो र भैँसी राख्ने व्यवस्था छ ।

हाटबजार सञ्चालनको व्यवस्थापनका लागि खरिदकर्ताबाट भने तीन सय रुपैयाँ लिने गाउँपालिकाले जनाएको छ । पशु हाटबजार दुई विघा क्षेत्रफलमा फैलिएको छ । यहाँबाट एक हजार पशु चौपाया खरिद बिक्री गर्न सकिन्छ । रूपन्देहीबाट मासुका लागि पाडो, राँगा र भैंसी काठमाडौँ, पोखरा र चितवनमा जान्छ भने उत्पादनशील गाईभैँसी विशेष गरि छिमेकी जिल्लामा लैजाने गरिएको छ ।