काठमाडौं । प्रधानमन्त्री शेरबहादुर देउवाका भतिजा एवं स्वकीयसचिव भानु देउवाका ज्वाइँ दीपेन्द्र कुँवर सशस्त्र प्रहरीको एसएसपी बढुवामा एक नम्बरमा सिफारिस भएपछि यो विषय चर्चामा छ ।

संगठनभित्रै उनको बढुवा छलाङलाई लिएर असन्तुष्टि बढेको छ । दुई नम्बर ज्येष्ठता क्रममा राखेर गएको आइतबार गृह मन्त्रालयले उनलाई बढुवा सिफारिस गरेको हो ।

एक नम्बरमा बढुवामा सिफारिस भएका प्रविण कँडेल नेपाल प्रहरीबाट स्थान्तरण भएर आएकाले कुँवर आफ्नो ब्याचमा एक नम्बरमा परेका हुन् । यसले उनको सशस्त्रको आईजीपी बन्ने सम्भावना बढेको छ ।

उनी एसपी हुँदा ११ नम्बरमा थिए । सशस्त्र प्रहरी इन्सपेक्टरमा भर्ना हुँदा ७५ जनामा उनी अन्तिममा थिए ।

बालुवाटारको दबाबमा उनी छलाङ मार्दै बढुवा सिफारिसमा परेका हुन् । त्यसो त नेपाल प्रहरीको डीआईजी र एसएसपी बढुवामा पनि बालुवाटारनिकट व्यक्ति नै अगाडि आएका छन् । सिनियर ब्याचलाई समेत उछिनेर जुनियरलाई अगाडि ल्याइएको छ ।

कुँवर कायममुकायम एसएसपी समेत हुन् । उनैका लागि कामु एसएसपीबाट एसएसपी बनाउन गृह मन्त्रालयले सशस्त्र प्रहरी बलको नियमावलीलाई नै संशोधन गरेको थियो ।

सशस्त्र प्रहरी नियमावली, ०७२ मा सशस्त्र प्रहरी सेवामा बढुवाका लागि सम्भावित उमेदवार हुन बढुवा हुने श्रेणी वा तहभन्दा एक तहमुनिको पदमा चार वर्ष सेवा अवधि पूरा भएको हुनुपर्ने प्रावधान थियो । तर, त्यसलाई संशोधन गरेर तीन वर्ष कायम गरियो । जसको प्रत्यक्ष लाभ कुँवरलाई भयो ।

सशस्त्र प्रहरीमा हाल तीन डीआईजीको दरबन्दी खाली छ । यस्तोमा डीआईजी बढुवामा कुँवर पर्ने निश्चित हुनेछ । जसले उनी भावी आईजीपी बन्ने मार्ग सहज हुनेछ ।

बैतडी पुर्ख्यौली घर भएका कुँवर इन्सपेक्टर र डीएसपी बढुवामा समेत वरीयतामा पछाडि थिए । तर, शक्तिकेन्द्रको दबाबमा उनी अगाडि आउँदा व्यावसायिक प्रहरी अधिकृतको मनोबल कमजोर भएको सशस्त्रका अधिकारीहरू बताउँछन् ।

यति मात्र होइन, सशस्त्रको नियमावलीअनुसार एसएसपीबाट डीआईजीमा बढुवा हुन अनिवार्य स्टाफ कलेज पास गरेको हुनुपर्ने प्रावधान छ । त्रिभुवन विश्वविद्यालयले लिने स्टाफ कलेजको प्रवेश परीक्षामै कुँवर दुईपटक ‘फेल’ भएका थिए । एक अधिकारीका अनुसार दुईपटक फेल भएपछि कुँवरलाई विनाप्रतिस्पर्धा नेपाली सेनाको स्टाफ कलेज कोर्समा सहभागी गराइएको थियो ।

सशस्त्रको एसएसपी बढुवा सिफारिस सूचीमा कँडेल र कुँवरसँगै दिग्विजय सुवेदी, विश्वकुमार भट्टराई, भूपेन्द्र केसीसहित १६ जना परेका छन् ।

सशस्त्रमा हुने आन्तिरक निर्णयमा समेत कुँवर हाबी देखिएको बताइन्छ । केन्द्र प्रबन्ध शाखाको जिम्मेवारी पाएका कुँवरसामु आईजीपी राजु अर्याल समेत निरीह रहेको बताइन्छ । लेखालगायत आर्थिक गतिविधि हुने स्थानमा कुँवरकै हालीमुहाली रहेको कतिपयको भनाइ छ ।

उनले आफूलाई ‘प्रधानमन्त्रीको मान्छे’ भन्दै सरुवा–बढुवामा समेत हस्तक्षेप गर्दै आएको सशस्त्रका अधिकारीहरूको गुनासो छ ।

उनले सशस्त्रको आईजीपी बनाउन समेत आफ्नो भूमिका रहँदै आएको बताउने गरेको अधिकारीहरूको भनाइ छ ।

तस्बिर : सामाजिक सञ्जालबाट