सुर्खेत । नेकपा (एमाले)का महासचिव शंकर पोखरेलले व्यवस्था परिवर्तनमा राजनीतिक दलबीचको एकता सफल भए पनि विकास र समृद्धिका विषयमा दलहरू एकजुट हुन नसकेको बताएका छन् ।

शनिबार सुर्खेतमा आयोजित कार्यक्रमलाई सम्बोधन गर्दै उनले नेपाल कम्युनिस्ट पार्टी (नेकपा)को निरन्तरता एमाले भएको जिकिर गरे ।

निर्वाचनमा टिकट नपाउने व्यक्तिले आफ्नै पार्टीका उमेदवारलाई जिताउन सहयोग नगर्नेजस्ता प्रवृत्ति देखिएको पनि उनले उल्लेख गरे ।

“चुनावमा आफूले टिकट पाए ठिक, अरूले पाए बेठिक भन्ने प्रवृत्ति सबैतिर देखियो । टिकट नपाए पनि जिताउँछु भन्नुपर्नेमा उल्टै असहयोग गरेको पाइयो,” उनले भने, “आफूले टिकट नपाउँदा घरमै बसिदिने, प्रचारप्रसारमा नजाने र उमेदवारलाई हराउन लाग्नेजस्ता प्रवृत्ति चुनावमा देखियो । यस्तो प्रवृत्ति कम्युनिस्ट आचरणभित्र पर्दैन ।”

एमाले स्थायी कमिटी सदस्य एवं कर्णाली प्रदेश इन्चार्ज यामलाल कँडेलले पार्टी कार्यकर्ता र जनप्रतिनिधिहरू सधैँ जनताको बीचमा देखिनुपर्ने बताए । “पार्टीमा पद पाउनासाथ आफ्नो गाउँमा, क्षेत्रमा पाइला नटेक्ने कार्यकर्ताबाट चुनाव जित्न सकिँदैन । जनताका माझमा पुगेर सुख–दुःखमा जसले साथ दियो उसैले जित्छ,” उनले भने । रासस