काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले भारत भ्रमणका क्रममा नेपाली कांग्रेसकी नेत्री आरजु राणा देउवा र आफूबीच भेटको विषयलाई षड्यन्त्र बनाएर प्रचार गरिएको बताएका छन् ।

शनिबार जनकपुरधाममा सञ्चारकर्मीसँग उनले आउँदो निर्वाचनपछि आरजुलाई प्रधानमन्त्री र शेरबहादुर देउवालाई राष्ट्रपति बनाउने भन्ने कुरा कुनै गिरोहले गरेको आपराधिक हल्ला मात्र भएको बताए । उनले सो कुरामा कुनै सत्यता नरहेको उल्लेख गरे । हुनै नसक्ने कुरालाई प्रचार गरिएको उनको भनाइ छ ।

प्रचण्डले झुटो कुरालाई अन्तर्राष्ट्रियस्तरमा समेत प्रचार गरिएको बताए । उनले भारतीय प्रधानमन्त्री नरेन्द्र मोदीले नभेट्नुको कारण कसैलाई प्रधानमन्त्री र राष्ट्रपति बनाउने भन्ने विषयलाई लिएर नरहेको स्पष्ट पारे । तथ्यहीन र षड्यन्त्रमूलक प्रचारबाजीबाट सबै सतर्क हुन आवश्यक रहेकामा उनले जोड दिए ।

सत्ता गठबन्धन निर्वाचनसम्म रहनेमा शंका नगर्न आग्रह पनि गरे ।

“यो सबै हावा कुरा हो । यो एकखालको भ्रम फैलाउने कुनै न कुनै गिरोहले गरेको आपराधिक हल्ला हो । त्यसमा कुनै सत्यता छैन । हुन सक्दैन,” उनले भने, “आरजु उपचारको क्रममा दिल्लीमा हुनुहुन्थ्यो, उहाँको स्वास्थ्यलाभको कामना गरेको हो । त्यो यति प्रचारमा लगियो कि अन्तर्राष्ट्रियस्तरमा पनि प्रचार भएछ । यस्ता वाहियात, तथ्यहीन र षड्यन्त्रमूलक कुराबाट जोगिनुहोला ।”

प्रचण्डले नागरिकता समस्या समाधान गर्न पाएकामा आफू निकै उत्साहित रहेको बताए । उनले अहिले नेकपा समाजवादी केन्द्र वा वामपन्थी एकताको विषयमा समेत छलफल भइरहेको जानकारी दिए ।

“जसपा फुटिसकेको अवस्था छ । यस अवस्थामा बाबुरामजी, माधवकुमार नेपालजी र उपेन्द्र यादवसँग वामपन्थी एकता वा समाजवादी केन्द्र वा चुनावी मोर्चा बनाउने विषयमा छलफल भइरहेको छ,” उनले भने, “औपचारिक रूपमा कुनै टुंगोमा पुगेको छैन । छिट्टै यस विषयमा निर्णय हुनेछ ।”