काठमाडौं । काठमाडौंको नयाँ बानेश्वर नजिकै फुटपाथ व्यापारीले बिरामी गाडीलाई बाटो नछोड्दा चर्काचर्की भएको छ ।

घरबाट विरामी बोकेको गाडी निस्किदा फुटपाथ व्यापारीले बाटो नछोड्दा दुबैपक्षबीच चर्काचर्की भएको काठमाडौं महानगरपालिका नगर प्रहरी बलका प्रमुख धनपति सापकोटाले बताए ।

“बिरामी बोकेको गाडीलाई बाटो छोड भन्दा व्यापारीले छोड्न मानेनन् । उल्टै व्यापारीले मुख छोडे, त्यसपछि दोहोरो चर्काचर्की भयो,” उनले भने, “मान्छेको मानवीय संवेदनाको कुरा पनि हुन्छ । उल्टै आफ्नो अधिकार जस्तो भनेर सास्ती दिए ।”

नयाँ बानेश्वर क्षेत्रमा नागरिकले फुटपाथकै कारण अत्याधिक सास्ती खेपिरहेको गुनासो पनि गरेको सापकोटोको भनाइ छ ।

सापकोटाले व्यापारीलाई कुनै पनि कारवाही नगरिएको बताए । उनले नयाँ बानेश्वर क्षेत्रमा अत्याधिक फुटपाथ व्यापार बढेको बताए । आफूहरुले सो क्षेत्रमा फुटपाथ व्यापार गर्न नदिने गरी गृहकार्य गरिरहेको बताए ।