दाङ । लुम्बिनी प्रदेशसभा सदस्य अमरबहादुर डाँगीले पदबाट राजीनामा दिएका छन् ।
नेकपा (एमाले)को तर्फबाट दाङको निर्वाचन क्षेत्र नम्बर–२ (ख) बाट लुम्बिनी प्रदेशसभा सदस्यमा निर्वाचित डाँगीले पदबाट राजीनामा दिएको प्रदेशसभा सचिवालयले पुष्टि गरेको छ । बुधबार प्रदेशसभा सचिवालयमा आएर उनले राजीनामा बुझाएको प्रदेशसभा सचिवालयले जनाएको छ ।
प्रदेशसभाका सचिव दुर्लभकुमार पुनले प्रदेशसभा सदस्य डाँगीले राजीनामा बुझाएको र सभामुखको निर्देशनानुसार प्रक्रिया अगाडि बढाएको जानकारी दिए । “उहाँले संविधानको धारा १८० को (क) अनुसार राजीनामा दिनुभएको छ । सभामुखज्यूले प्रक्रिया अगाडि बढाउन भन्नुभएको र सचिवालयले प्रक्रिया अगाडि बढाएको छ,” पुनले भने ।
डाँगीले मुख्यमन्त्री शंकर पोखरेलको साथ छोडेको मंगलबार नै सार्वजनिक भएको थियो । घोराही नगरपालिकाका पूर्वमेयरसमेत रहेका डाँगी एमालेभित्र माधवकुमार नेपाल पक्षधर मानिन्थे ।
