काठमाडौं । अख्तियार दुरुपयोग अनुन्धान आयोगले कञ्चनपुरको महाकाली अस्पतालको स्वास्थ्य उपकरण खरिदसम्बन्धी कागजात नियन्त्रणमा लिएको छ । 

अस्पतालले सघन उपचार कक्ष (आईसीयू) सञ्चालनका लागि खरिद गरेका स्वास्थ्य उपकरणहरूबारे जनगुनासो बढेपछि अख्तियारले स्वास्थ्य उपकरण खरिदसम्बन्धी कागजात नियन्त्रणमा लिएको हो । अख्तियारको कार्यालय कञ्चनपुर स्रोतले अस्पतालबाट स्वास्थ्य उपकरण खरिदसम्बन्धी कागजात नियन्त्रणमा लिएको पुष्टि गरेको छ । 

अख्तियारको कार्यालय कञ्चनपुरका प्रमुख बाबुराम खतिवडाले पनि कागजात नियन्त्रणमा लिएको स्वीकार गरेका छन् । 

“हामीले प्रोसेसको बारेमा धेरै भन्न मिल्दैन । उजुरी प्राप्त भएको छ । अनुसन्धान भइराखेको छ,” उनले बाह्रखरीसँग टेलिफोनमा भने । अस्पतालले सुदूरपश्चिम प्रदेशको सामाजिक विकास मन्त्रालयबट प्राप्त एक करोडबाट आईसीयू सञ्चालनका लागि भेन्टिलेटरसहितका पाँच उपकरण खरिद प्रक्रिया अघि बढाएको थियो ।

सोही बजेटबाट अस्पतालले भेन्टिलेटरसहितका उपकरण खरिदका लागि सातदिने सूचना जारी गरेको थियो । आरजी सप्लायर्स प्रा.लि. काठमाडौंले उपकरण खरिदको जिम्मेवारी पाएको थियो ।  उक्त सप्लायर्सले अस्पताललाई विभिन्न पाँच स्वास्थ्य उपकरणमध्ये भेन्टिलेटर यसअघि नै प्रयोगमा ल्याइएको पाइएको अस्पताल स्रोतले दाबी गरिरहेको छ । 

अस्पतालको चिकित्सक स्रोतले सप्लायर्सले उपलब्ध गराएको भेन्टिलेटर सन् २०१७ देखिनै ‘क्यालिब्रेट’ भएर २०२० सम्म पटक–पटक सञ्चालनमा आएको देखिएको दाबी गरेको छ । स्वास्थ्य उपकरण उपलब्ध गराउने ठेक्का पाएको सप्लायर्सले अस्पताललाई प्रयोगमा आइसकेको भेन्टिलेटर बिक्री गरेको समाचार बाहिरिएपछि प्रदेश सरकारले प्राविधिक टोली पठाएर ती उपकरणको निरीक्षण गरिसकेको छ । 

सामाजिक विकास मन्त्रालयको प्राविधिक टोलीले भेन्टिलेटर २०१५ डिसेम्बरमा बनेको, ट्रलीबाट ह्विलसम्म खिया लागेको, अक्सिजन पाइपमा खिया लागेको, देब्रेपट्टिको भागमा ७÷८ सेन्टिमिटर कालो दाग देखिएको, एक घण्टा ब्याकअप दिने ब्याट्री नभएको, डिस्प्ले र नोव फोहर अवस्थामा रहेको, सफ्टवेयरअनुरूप दुई घण्टा चलेको, क्यालिब्रेसन नगरेको र स्पेसिफिकेसनअनुरूप भेन्टिलेटरका अन्य एसेसिरिज नभएको पाइएको जनाएको छ । 
 

मेसिनका केही भाग छैनन्, बाँकीमा खिया लागेको छ

महाकाली अस्पताललाई प्रयोगमा आएको भेन्टिलेटर बिक्री !