काठमाडौं । नेपाली कांग्रेसका नेताहरुले सरकारविरुद्ध आन्दोलन गर्नुपर्ने बताएका छन् ।
महेन्द्रनारायण निधि स्मृति प्रतिष्ठानले बसुन्धारामा आयोजना गरेको महेन्द्रनारायण निधिको ९८ औं जन्मजयन्ति समारोहमा बोल्दै कांग्रेस नेताहरुले सरकारको कार्यशैली र भ्रष्ट प्रवृतिविरुद्ध शान्तिपूर्ण र अहिंसात्मक आन्दोलन गर्नुपर्ने बताएका छन् ।
कांग्रेस सभापति शेरबहादुर देउवाले प्रजातन्त्रका लागि अन्तिम लडाइँ लड्नुपर्ने बेला भएको बताए । "कुनै पनि हिंसाबाटमुक्त समाज निर्माण र प्रजातन्त्रका लागि कुनै पनि किसिमको सम्झौता नगरिने सभापति देउवाले बताए । उनले भने, "पिसफुल वातावरण नभएपछि आन्दोलन लड्नै पर्छ । कांग्रेसले लड्ने आन्दोलन शान्तिपूर्ण र अहिंसात्मक हुनेछ ।"
सभापति देउवाले आफूले तत्लकालीन माओवादीलाई आफूसँग ल्याए पनि साथीहरुले भगाइदिएको गुनासो पनि गरेका छन् । उनले भने, "माओवादी र एमाले मिल्दा चुनाव हार्यौं । मैले माओवादीलाई आफूसँग ल्याएकै हुँ तर, साथीहरुले भगाइदिए । सत्य कुरो त्यो हो । बुझे पनि कुरो नबुझेको गर्ने ?"
सभापति देउवाले पार्टीमा धेरै समस्या आएको पनि बताए । उनले भने, "पार्टीको झगडा पहिलेबाटै आएको हो । झगडाका बारेमा गणेशमान सिंह, कृष्णप्रसाद भट्टराई, गिरिजाप्रसाद कोइरालालाई थाहा होला । वीपी र गणेशमानलाई पनि पार्टीबाट निस्कासन गरेकै थियो । गणेशमानले पार्टीमा छैन भनेको हो भने भट्टराईले पार्टी छाडेकै हो ।"
नेकपाको कम्युनिस्ट स्टेट बनाउने उद्देश्यविरुद्ध लड्नुपर्छ : निधि
काठमाडौं । नेपाली कांग्रेसका उपसभापति विमलेन्द्र निधीले सत्तारुढ नेपाल कम्युनिस्ट पार्टी कम्युनिस्ट स्टेट बनाउन उन्मुख भएको बताएका छन् ।
महेन्द्रनारायण निधि स्मृति प्रतिष्ठानले बसुन्धारामा आयोजना गरेको महेनद्रनारायण निधिको ९८ औं जन्मजयन्ति समारोहको बोल्दै उपसभापति निधिले नेकपाको कम्युनिस्ट स्टेट बनाउने लक्षयविरुद्ध लड्नुपर्ने बताए ।
उनले भने, "लड्नका लागि कम्युनिस्टले दुई लट्ठी हाने हामी चार लठ्ठी हान्छौं भन्ने होइन, हामीले लडाई अहिंसाका माध्यमबाट गर्नुपर्छ । जनवादी केन्द्रियतालाई आफ्नो मार्ग निर्देशक सिद्धान्त मान्ने कम्युनिस्ट सत्तामा छ । जसले संघीय लोकतान्त्रिक गणतन्त्रात्मक व्यवस्थालाई चुनौती दिइरहेको छ । सरकारले गरिरहेको भ्रष्टाचार, एकपछि अर्को गरी ल्याइरहेको विवादस्पद विधेयक, विवादस्पद निर्णयहरु सबै हेर्दा सरकार अधिनायवादतर्फ उनमुख छ ।"
१४ औं महाधिवेशनलाई वैचारिक आधारमा एकताका साथ सम्पन्न गर्नुपर्ने उपसभापति निधिको तर्क छ । सम्भावित अधिनायकवाद ल्याउने खतराविरुद्ध सशक्त आन्दोलन गर्न महाधिवेशन समयमै गर्नुपर्ने उनले बताए ।
कांग्रेसले स्वमूल्यांकन गर्नुपर्छ : नेता सिंह
नेपाली कांग्रेसका अर्का नेता प्रकाशमान सिंहले कम्यनिस्टको दबदबामा आमजनता आजित भएको समयमा कांग्रेसले जनताको अपेक्षा अनुसार काम गर्न सक्यो कि सकेन भन्ने स्वमूल्यांकन गर्नुपर्ने बेला भएको बताएका छन् ।
उनले भने, "कांग्रेसले जनताको अपेक्षा अनुसारको काम गर्यो कि गरेन भनेर मनन गर्नुपर्ने समय आएको छ । जनअपेक्षा अनुसार काम गर्न नसके कांग्रेस प्रजापरिषद बन्छ कि भन्ने चिन्ता लागिरहन्छ ।"
संविधानका मूल मर्म र भवना विपरितका विधेयकको इन्डिकेसनले सरकारले जनवादी केन्द्रीयता लाद्न खोजेको नेता सिंहले बताए । उनले भने, "मुलुक चुनौतीपूर्ण अवस्थामा गुज्रिरहेका बेला कांग्रेसले महेन्द्रनरायण निधिले अंगिकार गरेको अहिंसाको आन्दोलन सुरुवात गर्नुपर्ने समय आएको छ । उनले चाहे अनुसार अहिलेको परिस्थितिमा पार्टीलाई अघि बढाए महेन्द्रनारायण निधिप्रति सच्चा श्रद्धाञ्जली हुनेछ ।"
संघर्षको मैदानमा कांग्रेसले सरकारविरुद्ध अहिंसा र शान्तिपूर्ण आन्दोलन आवश्यक : नेता सिटौला
कांग्रेसका अर्का नेता कृष्णप्रसाद सिटौलाले आफैंभित्रका अनेक मतलाई जीवन्त राखेर नेपाली कांग्रेसले स्वस्थ प्रतिष्पर्धाका माध्यमबाट महाधिवेशनलाई सफल बनाउनुपर्ने बताए । उनले भने, "संघर्षको मैदानमा कांग्रेसले सरकारविरुद्ध अहिंशा र शान्तिपूर्ण आन्दोलन गर्नुपर्छ । लाखौं जनतालाई शानित्का माध्यमबाट सडकमा ओराल्नुपर्ने समय आइसकेको छ ।
सरकार शान्ति र अहिंसाका माध्यमबाट कांग्रेसको नेतृत्वमा आएका परिवर्तनलाई मास्न खोजिरहेका छ ।"
सरकारले शान्ति र अहिंसाका माध्यमबाट आएको संविधानलाई राष्ट्रलाई समृद्ध बनाउन, राष्ट्र निर्माणका लागि बल पुर्याउन नभएर नितान्त कम्युनिस्ट पार्टीको स्वार्थका लागि प्रयोग गरिरहेको उनले बताए । यसका विरुद्ध कांग्रेसले अब शान्तिपुर्ण र अहिंसात्मक आन्दोलन गर्न जरुरी भइसकेको उनले बताए ।
त्यसैगरी अर्का नेता प्रदीप गिरीले अहिंसाका आधारमा २१ औं शताब्दीमा दुनियाँभरका परिवर्तन हुनुपर्ने बताएका छन् । उनले भने, "अहिंसात्मक सत्याग्रहबाट पाँच लाख जनता सडकमा ल्याएर कांग्रेसले अधिनायवाद उन्मुख सरकारलाई निकाल्न सक्छु भन्नु निधिप्रति सच्चा श्रद्धाञ्जली हुन्छ । अहिले देशमा भ्रष्टाचार, दूराचार, कानुनविपरित छ ।"
