खोज्दा–खोज्दै प्रहरी थाक्यो

विदेश

खोज्दा–खोज्दै प्रहरी थाक्यो

बाह्रखरी मंगलबार, पुस ८, २०७६

न्युजिल्यान्ड । न्युजिल्यान्डको प्रहरीले हालै त्यहाँ भएको ज्वालामुखी विस्फोटको घटनामा परेर हराइरहेका दुई जनाको खोजी स्थगित गरेको छ ।

ह्वाइट आइल्यान्डमा भएको ज्वालामुखी विस्फोटमा १९ जना मारिएका थिए । दुईजना अझै भेटिएका छैनन् । घटना यही डिसेम्बरको ९ मा भएको थियो । १७ वर्षीया विनोना जान लांगफोर्ड र ४० वर्षीय हाइडेन ब्रायन मार्सल इमान सो आइल्यान्डमा हराएका थिए ।

प्रहरीले विभिन्न हिसाबले खोजी गरे पनि उनीहरूबारे केही पत्ता लाग्न सकेन । प्रहरीले ती दुईबारे कुनै कुरा पत्ता लगाउन नसकेपछि खोजी स्थगित गरेको हो ।

प्रहरीले ती दुवैका परिवारलाई खोजी स्थगनको जानकारी गराइएको बताएको छ । नयाँ कुनै समाचार आए उनीहरूलाई खबर गरिनेसमेत प्रहरीले जनाएको छ । ती दुवै अस्ट्रेलियाको सिड्नीबाट घुम्न त्यहाँ गएका थिए । –बीबीसी