काठमाडौं । काडमाडौं उपत्यकाको सुरक्षा व्यवस्थासँग मुलुककै सुरक्षा व्यवस्थाको भविष्य जोडिएको हुन्छ ।  त्यसैले काठमाडौंको प्रहरी प्रमुखलाई बरियताको क्रममा सानो भए पनि उनलाई दोस्रो आईजीपी भन्ने गरिन्छ । किनभने, काठमाडौंको जनसङ्ख्यासँगै सुरक्षा व्यवस्थाको चुनौती पनि धेरै हुन्छ ।

काठमाडौंको सुरक्षा व्यवस्थाले मुलुकको सुरक्षा व्यवस्थाको प्रतिनिधित्व गर्छ ।  काठमाडौं प्रहरी प्रमुख र अपराध महाशाखाका प्रमुख एसएसपी परिर्वतन गर्ने तयारी करिव ४ महिना अघि नै भएको थियो ।

काठमाडौं प्रहरी प्रमुख र अपराध महाशाखाको प्रमुखको सरुवा नियमत ४ महिना अघि नै हुनुपर्ने हो । तर गृहमन्त्री र प्रहरी महानिरीक्षकबीच कुरा नमिलेका कारण सरुवा लबिएको थियो ।

काठमाडौंका यी दुई मुख्य स्थानमा को ल्याउने भन्ने बारेमा प्रहरी प्रमुख र गृहमन्त्रीको सहमति भएपछि मात्र सरुवा गरिने चलन भने यसपटक तोडिएको छ ।

जब काडमाडौं परिसर, अपराध महाशाखा र ललितपुर प्रहरी प्रमुखमा को ल्याउने भन्ने कुरा भयो त्यहीदिन देखि प्रहरी प्रमुख र गृहमन्त्रीबीच विवाद बढेको प्रहरीका उच्च अधिकारी बताउँछन् ।

सरुवाको कुरा हुँदै गर्दा गृहमन्त्री विमलेन्द्र निधीले काठमाडौं प्रहरी प्रमुखमा छबिलाल जोशी र अपराध महाशाखामा दिनेश अमात्य ल्याउने प्रस्ताव पहिले नै गरेका हुन् । तर महानिरीक्षक अर्यालले असहमति जनाए ।  अर्याल चार महिना बित्न लाग्दासमेत यो कुरा मान्न तयार थिएनन् । 
प्रहरी मुख्यालय स्रोत भन्छ, “यी दुई जनाको कारणले धेरैको सरुवा रोकिएको थियो ।”

काठमाडौं प्रहरी प्रमुखमा स्वच्छ छवी भएका, आर्थिक लोभमा नफस्ने व्यक्तिलाई ल्याउनुपर्ने अर्यालको अडान रहेको थियो । तर गृहमन्त्री निधीले दुई जनाका लागि अडान छाड्दै छाडेनन् ।

“गृहमन्त्रीको प्रस्ताव आइजीले पटक पटक अस्वीकार गर्नुभएको थियो,” प्रहरी प्रधान कार्यालय स्रोत भन्छ, “प्रहरी प्रधान कार्यालयको सहमतिमा गृह मन्त्रालयले सरुवा निकाल्ने हो । तर ४ महिनासम्म दुई जनाका कारण सम्पूर्ण एसएसपीको सरुवा रोकियो । अन्तिममा गहृमन्त्री निधीले एकलौटी सरुवा गर्ने तयारी गरेपछि सहमतिमा आउन बाध्य हुनुभयो । तर यो उहाँलाई पटक्कै चित्त बुझेको छैन ।”

काठमाडौं प्रहरी प्रमुख र अपराध महाशाखामा ल्याइएका ल्याएका जोशी र अमात्य स्वच्छ छवीको नभएको महानिरीक्षकको ठहर रहेको स्रोतले जानकारी दियो ।

बुधबार भएको सरुवाअनुसार महानगरीय प्रहरी अपराध महाशाखा प्रमुख सर्वेन्द्र खनाल महानिरीक्षकको सचिवालयमा लगिएको छ भने उनको ठाँउमा दिनेश अमात्यलाई ल्याइएको छ । महानगरीय प्रहरी परिसर प्रमुखमा छविलाल जोशीलाई सरुवा गरी ल्याइएको छ । 

त्यसैगरी प्रहरी प्रशिक्षण प्रतिष्ठान चितवनमा रहेका एसएसपी रमेश खरेललाई प्रहरी मुख्यालय, युएन शाखामा सरूवा गरिएको छ । ललितपुर प्रहरी प्रमुखमा एसएसपी ठूले राईलाई ल्याइएको छ । त्यसैगरी एसएसपी महेन्द्र पोखरेल सिन्धुली तालिम केन्द्र, दीपक थापा लुम्विनी प्रहरी प्रमुखमा र उत्तम कार्की कोशी प्रहरी प्रमुखमा सरुवा भएका छन् ।

ललितपुर प्रमुख भएर चलाएका पिताम्बर अधिकारीलाई मेची प्रहरी प्रमुखमा सरुवा गरिएको छ । त्यस्तै, केन्द्रीय अनुसन्धान ब्युरोमा शेरबहादुर वस्नेत, सुदुरपश्चिम क्षेत्रीय प्रहरी तालिम केन्द्र, दिपायलमा मोहन जोशी र सगरमाथा अञ्चल प्रहरी प्रमुखमा बलराम शर्मा पुगेका छन् ।

एसएसपी विष्णुहरी गौतम गण्डकी अञ्चल प्रमुख, कर्णालीमा सुरज केसी, महाकालीमा सुशील भण्डारी र वागमतीमा पुष्प रन्जित सरुवा भएका छन् ।