काठमाडौं । काठमाडौं महानगरपालिकाले महानगर क्षेत्रमा रहेका भवनको निर्माण सम्पन्न प्रमाणपत्र तथा निर्माण प्रमाणित गर्न सुरु गरेको छ । महानगरले मापदण्डभित्र रहेर भवन निर्माण भए÷नभएको प्रमाणित गर्न सुरु गरेको हो । 

महानगरका राजश्व महाशाखा प्रमुख धु्रव काफ्लेका अनुसार महानगरले २०७३ असार अन्तिमसम्म निर्माण गरिएका सबै प्रकृतिका भवनको निर्माण  सम्पन्न प्रमाणपत्र तथा निर्माण प्रमाणित गर्नेछ । घरधनीले पुस अन्तिमसम्ममा प्रमाणित गरिसक्नुपर्नेछ । पुस मसान्तसम्म भवन निर्माण  सम्पन्न प्रमाणपत्र तथा निर्माण प्रमाणित नगरे स्थानीय स्वायत्त शासन ऐन, २०५५ बामेजिम कारबाही हुनेछ । ऐनको दफा १६३ मा निर्माण  स्वीकृति लिइएको वा बढी लिएको पाइएमा भत्काउन निर्देशन दिइने उल्लेख छ । साथै आफैं भत्काउन नमाने महानगरले भत्काइदिनेछ । तर, महानगर आफैंले भत्काउनुपरे त्यसबापत लाग्ने खर्च घरधनीले नै तिनुपर्ने ऐनमा उल्लेख छ ।

प्रमाणित गर्नका लागि सेवाग्राहीले जग्गाधनी प्रमाणपत्र पुर्जाको प्रतिलिपि र आशिंक भवन नक्सा स्वीकृति लिएको भए सोको प्रतिलिपि आवश्यक पर्नेछ । त्यसैगरी स्वीकृति नलिई निर्माण भएको भए सोको स्केच, क्षेत्रफल र तला स्वयं घोषणा गरिएको निवेदन, निर्माण सम्पन्न लिएको भए सोको प्रतिलिपि र चालु आर्थिक वर्षसम्मको मालपोत तथा घर जग्गा, बहाल, व्यवसाय र मनोरञ्जन कर तिरेको कागजपत्र बुझाउनुपर्नेछ । काठमाडौंमा करिब २ लाख भवन छन् । तर, भवन निर्माण स्वीकृत नलिएका र स्वीकृति लिएभन्दा बढी भवन निर्माण गरिएका भवनको एकिन तथ्याकं महानगरसँग छैन ।