राजनीति
काठमाडौं । नेकपा माओवादी केन्द्रले केन्द्रीय समिति सदस्यको संख्या घटाउने भएको छ । तर यसको विधिबारे नेताहरूबीच कुरा मिल्न सकेको छैन । २५ सय हाराहारीमा रहेको केन्द्रीय समितिको संख्या घटाउन माओवादी केन्द्रका नेताहरू एकमत देखिए पनि कति संख्यामा झार्ने र कुन विधि अबलम्बन गर्ने भन्नेमा फरक मत भएपछि निर्णय हुन सकेन ।
केन्द्रीय सदस्यको संख्या घटाउने भन्ने निर्णय लिन आइतबार पार्टी अध्यक्ष पुष्पकमल दाहाल निवास लाजिम्पाटमा बसेको माओवदी केन्द्रको हेडक्वार्टर बैठकमा नेताहरूबीच नै मत बाझिएपछि विना निष्कर्ष सकिएको थियो ।
आज पनि यसबारेमा छलफल गर्न माओवादी केन्द्रको बैठक बोलाइएको थियो । बैठकमा सहमति कायम हुन नसकेपछि कात्तिक १० र ११ गते राष्ट्रिय भेला बोलाउने निर्णय गरेको छ । भेलाले नै यसबारेमा थप निर्णय गर्नेछ ।
माओवादी केन्द्रकी प्रवक्ता पम्फा भुषालले भनिन्, “ बैठकमा संगठन सुदृढिकरण सम्बन्धि छलफल भयो । यसबारेमा थप निर्णय लिन कात्तिक १० र ११ गते राष्ट्रिय भेला बोलाउने निर्णय भएको छ । ”
माओवादी केन्द्रका कार्यालय सचिव प्रह्लाद बुढाथोकिले केन्द्रीय समितिको संख्या घटाउनेबारे छलफल भएको बताए । बुढाथोकिले केन्द्रीय सदस्यको संख्या झार्नेमा सबै नेताहरू एकमत भएको तर कुन प्रक्रिया अवलम्बन गर्ने भन्नेमा नेताहरुबीच कुरा नमिलेको बताए । उनले भने, “बैठकमा एकता भएको दिन जेठ ६ गते कै जति ४ सय ९९ सदस्यीय केन्द्रीय समितिमा झार्ने वा त्यसमा पूर्व राज्यसमितिका सदस्यहरु थपेर त्यो भन्दा अलि बढी बनाउने कि भन्नेमा नेताहरुले आ–आफ्नो दृष्टिकोण राख्नुभएको छ ।”
केन्द्रीय सदस्य जेठ ६ गते तय भएको जति ४ सय ९९ नै बनाउनुपर्ने बादल समूहको धारणा रहेको छ भने पूर्व एमाओवादीका नेताहरू भने यसरी अघि बढ्दा सिनियर नेताहरू पनि जुनियर स्थानमा बस्नुपर्ने भन्दै त्यो भन्दा बढी हुनुपर्ने पक्षमा देखिएको स्रोतले जानकारी दियो ।
पूर्व एमाओवादीका एक नेताले भने, “केन्द्रीय सदस्यको संख्या ५ सयमा झार्ने हो भने पहिले पार्टी एक हुँदाका धेरै सिनियर साथीहरु अहिले जुनियर हुने अवस्था आउँछ । त्यसैले यसको समाधान राष्ट्रिय महाधिवेशनबाट टुङ्गो लगाउँ वा ५ सय केन्द्रीय सदस्यमा पूर्व राज्यसमितिका सदस्य र केही सिनियर नेताहरूलाइ केन्द्रीय सदस्यमा थप गरेर संगठन चुस्त बनाउन सकिन्छ ।”
बादल समूहबाट आएका अर्का एक नेताले भने पार्टी एकतालाई पार्टी प्रवेश सम्झन नहुने बताए । उनले भने, “पार्टी एकता हुँदा जुन तह र तप्कामा नेता तथा कार्यकर्ता थिए त्यही तह नै राख्नुपर्छ । केन्द्रीय सदस्यको संख्या घटाउने भए जेठ ६ गतेको एकतापछि बनाइएको ४ सय ९९ सदस्यीय नै बनाउनुपर्छ ।”
तस्बिर ः प्रधानमन्त्री सचिवालय
प्रकाशित मिति: सोमबार, असोज १०, २०७३ १०:४३
प्रतिक्रिया दिनुहोस्