जनकपुरधाम उप–महानगरपालिकाको मेयर पदका स्वतन्त्र उमेदवार हुन्, मनोज कुमार साह । सत्तारुढ दलले जनकपुरको मेयरमा जनता समाजवादी पार्टी (जसपा)को उमेदवार उठाउने सहमति गरेपछि नेपाली कांग्रेसबाट राजीनामा दिएर उनले स्वतन्त्र उमेदवारी दिएका हुन् ।

नेपाली कांग्रेस नगर सभापतिसमेत रहेका साह साधारण सदस्यसमेत नरहने गरी राजीनामा दिएर अहिले केन्द्रको निर्णयलाई गलत सावित गर्ने अभियानमा छन् ।

०७४ को स्थानीय निर्वाचनमा मधेसको रापतापको बेला पनि १२ हजार मत प्राप्त गरेका उनी यसपटक चुनाव जित्ने दाबी गर्छन् । सम्पूर्ण कांग्रेसीजनले आफूलाई मत दिनेमा उनी ढुक्क छन् । शीर्ष नेताहरुले मधेससँग अन्तरघात गरेको उनको बुझाई छ । प्रस्तुत् छ, स्वतन्त्र उमेदवार साहसँग बाह्रखरीका लागि कमलेश ठाकुरले गरेको कुराकानीको सम्पादित अंश :

स्वतन्त्र उमेदवारी किन दिनुभयो ?

म नेपाली कांग्रेसको उमेदवार ०७४ सालमा भइसकेको व्यक्ति हुँ । यो पाँच वर्षमा नेपाली कांग्रेसको रक्षाका लागि २५औं वडामा संगठन मजवुत बनाएँ । ०४५ सालदेखि निरन्तर पार्टीको लागि काम गर्दै आएको छु । ३३ वर्षदेखि पार्टीको तर्फबाट जनतालाई सेवा गरेको छु । २००७ सालदेखि अहिले ०७९ सालसम्म पनि कांग्रेसको इतिहास छ । र, केन्द्रीय नेतृत्वले कांग्रेससँग धेरै ठूलो धोका दिएको छ ।

किनभने सबलाई थाह छ, जब मधेस जित्छ । तब मात्रै केन्द्रमा सरकार बन्छ । मधेस भनेको उर्वरभूमी कांग्रेसले ठान्दछ । कांग्रेसको उर्वरभूमी मधेस हो भने बीउलाई त सुकाउनु हुँदैनथ्यो । किनभने नेपाली कांग्रेसका साथीहरूले अरु दलको उमेदवारलाई मत दिँदैनन् । त्यस्तो अवस्थामा पार्टी गठबन्धनमा गयो । केन्द्रीय निर्णयको हामी जोडदार विरोध गरेका छौं । चरणबद्ध आन्दोलन पनि गरेका छौं । चरणवद्ध आन्दोलनमा सच्चिन मौका पनि दियौं । तर, कुनै उपाय लागेन । कांग्रेसी समाप्त गर्ने हिसावले कांग्रेसको घरमा आगो लगाइदियो ।

कांग्रेस र प्रजातान्त्रिक शक्ति बन्नका लागि मेरो स्वतन्त्र उमेदवारी परेको छ । किनभने म नेपाली कांग्रेसको मान्छे हुँ । मसँग चार तारा छ, जय नेपाल पनि छ । केन्द्रीय नेतृत्वको विरोधमा सम्पूर्ण नेपाली कांग्रेसले २५ औं वडाका सभापति र वडाध्यक्षका उमेदवारहरु मिटिङ्ग गरेर मलाई नेपाली कांग्रेसलाई जोगाइदिनु पर्यो भन्नु भएको छ ।

हामी साथीहरू एक साथमा संगठित भएर जानुपर्दछ । किन भने हामी कम्युनिष्ट हुन सक्दैनौं, हामी मधेसवादी हुन सक्दैनौं । त्यसैले हामीले हिमाल पहाड, तराई सबैलाई जोड्नु पर्छ । त्यसको लागि राम्रो साथी चाहिएको छ । उहाँहरूको आग्रहमा कुनै विकल्प नभएपछि मलाई अगाडि सार्नु भएको छ । त्यसैले उमेदवार बन्नका लागि मैले पार्टीबाट राजीनामा दिएँ । 
 

कांग्रेसकै गोप्य सहमतिमा तपाईंको उमेदवारी परेको हो ?

हो, नभए मेरो मतदानको अधार के हो ? अहिले २५ वटै वडामा अध्यक्ष हुनुहुन्छ, वडाध्यक्षको उमेदवारहरू हुनुहुन्छ उहाँहरु नै हाम्रो उमेदवार हो । उहाँहरु नै मेरो मतदाता हो । हामीसँग जति पनि काम गरेका साथीहरू छन्, उनीहरुकै सहयोगेमा मैले निर्वाचन लडेको छु ।
  
पार्टीबाट राजीनामा दिइसकेपछि पनि तपाईंलाई त्यही पार्टीका मतदाताको भर छ ?

यो प्राविधिक कुरा हो । केही कुरा अघोषित रूपमा हुन्छ, केही कुरा घोषित रुपमा हुन्छ भने केही कुरा बुझ्नु पर्ने पनि हुन्छ । यो टेक्निकल कुरा मात्रै हो ।

किनभने राजीनामा नगरी उमेदवारी दिएको भए केन्द्रीय कार्य समितिले मलाई कारबाही गर्न सक्थ्यो । त्यसैले अरुलाई किन असहज महसूस हुन दिने । भाइटल पदमा वागी हुन त पाउँदैनन् नि । त्यसैले मैले अहिले पार्टीलाई स्वतन्त्र गरिदिएको छु । र, स्वतन्त्र उमेदवारी दिएको छु  म लोकतन्त्रवादी मान्छे हुँ । मलाई नै भोट दिन्छन् । शेरबहादुर देउवाले पनि मेरै भोट मागिरहेका छन् । मलाई लाग्छ, ३० गतेपछि नेपाली कांग्रेसले मलाई स्वीकार गर्छ । 

गठबन्धनलाई हराउने अभियानमा हुनुहुन्छ ? 

यो गठबन्धन हुँदै होइन । यो ठगबन्धन हो । ठगबन्धन किन हो भने जब २५ वटा वाडमा नेपाली कांग्रेसको वडाध्यक्ष चुनाव लड्दै छन् । र, २५ वटै वडामा उपेन्द्र यादवको पार्टी पनि निर्वाचन लड्दै छ । हाम्रो पार्टीलाई त्यो उपेन्द्र यादवको पार्टीले हराउने, के हाम्रो पार्टीले उपेन्द्र यादवको पार्टीलाई भोट दिने मेयरमा ? ।

यो कुन हिसाबले गठबन्धन भएको छ । गठबन्धन त भएकै छैन । वैज्ञानिक गठबन्धन होइन, यो जवर्जस्ती लादिएको गठबन्धन हो । कुनै व्यक्तिलाई ल्याउन कुनै रिसिबिको कारण कुनै व्यक्तिलाई धपाउन यो गठबन्धन बनेको हो । यसले कांग्रेसलाई घाटा गरेको छ । केन्द्रीय नेतृत्वले सच्चिनु पर्दछ । यो हाम्रो अहिले पनि माग छ । 

तपाईंको जित्ने अधार के–के छन् ? 

राजनीति राज्यको नीति बनाउने नेता हो । जसले देशलाई समर्पित गर्दछ, आफूलाई समाजसेवा क्षेत्रमा योगदान दिनुपर्छ । उहाँहरु व्यापारी हुन्, ठेकेदार हुन् । यस्ता उमेदवारलाई जनताले रुचाउने छैनन् । हामी बिहान ६ बजेदेखि १० बजे रातिसम्म समाजको लागि सोच्छौं । म सँग ०७४ को अनुभव छ ।

प्रतिपक्षमा रहेर सँधै खबरदारी र कमजोरी उजागर गर्ने काम गरेका छौं । हमेशा जनताको सेवाको लागि काम गरेको छु । कोभिडको समयमा पनि हामीले महत्त्वपूर्ण भूमिका निर्वाह ग¥यौं । हामीले कृषिका कार्यक्रम ल्याउने कुरा गरेका छौं । आउटर रिंगरोडको योजनाबारे कुरा गरेका छौं । हामीले कनेक्टिभिटिका बारेमा कुरा गरेका छौं । रोडवेज र एयरवेजका बारेमा कुराहरू गरिरहेका छौं । शिक्षा र स्वास्थ्यका बारेमा विशेष योजना ल्याएका छौं । भ्रष्टाचारलाई न्युनीकरण गर्ने छौं । पालिकामा सुशासन कायम गराउँछौं ।