काठमाडौं । प्रधानन्यायाधीश चोलेन्द्रशमशेर जबराले आजदेखि नियमित पेसी तोकेका छन् ।
यही कात्तिक ८ गते नेपाल बार एसोसिएसनले प्रधानन्यायाधीशको राजीनामा माग्ने निर्णय गरेको थियो । न्यायाधीशले प्रधानन्यायाधीशले डाकेको ‘फुल कोर्ट’ अस्वीकार गर्दै इजलास जान छोडेका थिए ।
प्रधानन्यायाधीश जबराले आफू ग्रेसफुल एक्जिट (सम्मानजनक बहिर्गमन)का पक्षमा रहेको भन्दै न्यायाधीश मनोज शर्मामार्फत सन्देश पठाएपछि १४ गते प्रधानन्यायाधीशसँगको संवादहीनता तोड्दै न्यायाधीशहरू १५ गतेदेखि इजलास फर्किएका थिए । प्रधानन्यायाधीश इजलासमा बस्न नहुने र बन्दी प्रत्यक्षीकरणबाहेकका मुद्दाको पेसी तोक्न नहुने समझदारी गरेर इजलास फर्किएका न्यायाधीशका सर्त प्रधानन्यायाधीशले कात्तिक १७ गतेसम्म मानेका थिए ।
तर, प्रधानन्यायाधीश जबराले सोमबार (हिजो) आफूसहितको संयुक्त इजलास तोकेर न्यायाधीशहरूसँग गरेको समझदारी तोडेका थिए । आज भने प्रधानन्यायाधीश जबराले नियमित पेसी तोकेका छन् । उनले नियमित पेसी तोक्दै आफ्नो एकल इजलासमा सातवटा मुद्दा राखेका छन् । उनले आफूबाहेकका नौवटै संयुक्त इजलास तोकेका छन् ।
न्यायाधीशहरूले भने प्रधानन्यायाधीशसँग इजलास साझेदारी नगर्ने र बन्दी प्रत्यक्षीकरणकाबाहेक मुद्दाको सुनुवाइ नगर्ने तयारी गरेका छन् ।