क्यानबेरा । एक नयाँ अध्ययनअनुसार अष्ट्रेलियाका छ मध्ये एक सरकारी कर्मचारी कार्यस्थलमै यौन उत्पिडनमा पर्ने गरेको पाइएको छ । यहाँको सार्वजनिक र सामुदायिक क्षेत्रका कर्मचारी युनियनले शुक्रबार जारी गरेको प्रतिवेदनले यस्तो तथ्य उजागर गरेको हो ।
मार्च १५ देखि अप्रिल १५ सम्म गरिएको सर्वेक्षणमा ३ हजार २८० कर्मचारीको सहभागिता रहेको द गार्जियनले जनाएको छ । सहभागी मध्ये १६ प्रतिशतले कार्यस्थलमा यौन दूर्व्यवहार भोगेको र १९ प्रतिशतले प्रत्यक्ष देखेको प्रतिक्रिया दिएका छन् ।
कार्यस्थलमा दूर्व्यवहार भोग्ने मध्ये १८ प्रतिशत महिला, ११ प्रतिशत पुरुष, ३५ प्रतिशत समलिंगी, २५ प्रतिशत फरक क्षमता भएका र २५ प्रतिशत एलजीबीटीआई रहेका प्रतिवेदनमा उल्लेख छ ।
सहभागी अधिकांश अष्ट्रेलियाको राजधानी र उत्तरी क्षेत्रका तथा सीएसआईआरओ, एबीसी, अष्ट्रेलिया पोष्ट, टेल्सट्रा लगायत ख्याती प्राप्त कम्पनीमा आबद्ध रहेका जनाइएको छ । सबैभन्दा अचम्मको कुरा यो पाइएको छ कि दूब्र्यबहार भोग्नेमध्ये एक तिहाई (३१ प्रतिशत)ले मात्र त्यसविरुद्ध रिपोर्ट गर्ने गरेका छन् । बाँकी ३२ प्रतिशतलाई छानबिनको निश्पक्षतामाथि विश्वास नभएर उजुरी नदिएको बताएका छन् भने १६ प्रतिशतलाई उजुरी गरेर अवस्था परिवर्तन हुनेमा विश्वास छैन । यस्तै अन्य १५ प्रतिशतले करियर बिग्रने डरले उजुरी नगरेको र ७ प्रतिशतले नितान्त गोप्य भन्दै कुनै कारण खुलाउन चाहेनन् ।
सहभागी ७० प्रतिशतलाई दूव्र्यबहार भए कोसँग परामर्श गर्ने ज्ञान भएको र ५२ प्रतिशतलाई रोजगारदाताले कस्ता व्यबहारलाई यौन दूव्र्यबहार मानिने जानकारी गराएको पाइएको छ ।
रक्षामन्त्रीको कार्यालयमा बलात्कृत भएको एक कर्मचारीको बयानपछि दबाबमा परेको प्रधानमन्त्री स्कट मोरिसनको सरकारमाथि यो प्रतिवेदनले थप दबाब दिने देखिएको छ ।
संसदकी पूर्वकर्मचारी ब्रिटानी हिगिङ्सले सहकर्मी क्रिष्टियन पोर्टरमाथि बलात्कारको आरोप लगाएकी थिइन् भने प्रधानमन्त्री मोरिसनले यसको छानबिनका लागि एक स्वतन्त्र टोली बनाउन असहमति जनाएका थिए । पोर्टर हाल उद्योग अन्वेषण तथा विज्ञानमन्त्री रहेका छन् ।