वेलिङटन । न्यूजिल्यान्डले भारतबाट आउने सबै यात्रीलाई आफ्नो मुलुक प्रवेशमा रोक लगाएको छ । न्यूजिल्यान्डले भारतमा कोरोना भाइरसको संक्रमण दर बढेपछि दुई हप्ताका लागि भारतबाट आउने यात्रुहरूलाई रोक लगाएको हो ।

बिहीबार न्यूजिल्यान्डको सीमामा भेटिएका २३ संक्रमितमध्ये १७ जना भारतीय रहेको पाइएपछि न्यूजिल्यान्ड सरकारले आक्रामक कदम चालेको हो । अप्रिल ११ देखि कार्यान्वयनमा आउने यो नियमअनुसार भारतबाट आउने सबै यात्रुहरूमा लागू हुनेछ । 

“हामी भारतीय यात्रीहरुका लागि न्यूजिल्यान्ड प्रवेशमा अस्थायी रोक लगाउँदै छौं,” प्रधानमन्त्री जसिन्दा आर्डनले पत्रकार सम्मेलनका क्रममा भनिन् ।

उनकाअनुसार विमानस्थलबाट प्रस्थान गर्नुपूर्व गरिने परीक्षणले अन्य देशबाट आउने संक्रमितको संख्या कम गर्न मद्दत गरे पनि भारतबाट आउनेहरूको सन्दर्भमा यस्तो नदेखिएकाले पछिल्लो कदम चाल्न सरकार बाध्य भएको हो ।

कोरोनाको दोस्रो लहर तीव्र गतिमा फैलिरहेको भारतमा हालसम्म एक करोड २८ लाखभन्दा बढीमा संक्रमण देखिइसकेको छ ।