काठमाडौं । नेकपा एमालेको ओली समूहले वाग्मती प्रदेशका पूर्वसामाजिक विकासमन्त्री तथा माओवादी केन्द्रका नेता युवराज दुलालले जिल्ला कमिटीका सदस्यलाई हातपात गरेको आरोप लगाएको छ ।
एमाले जिल्ला कमिटी सदस्य एवं इन्द्रावती मेलम्ची सामाजिक उत्थान कार्यक्रमका अध्यक्ष विष्णुमणि आचार्य र सोही संस्थामा कार्यरत कर्मचारी अशोक कोइरालालाई राजेश्वरी माध्यमिक विद्यालयको प्रांगणमै हातपात गरेको ओली समूहका अध्यक्ष बालकृष्ण देउवाको जिकिर छ ।
सामान्य विवादमा विद्यालयको प्रांगणमा हातपात गरेको आरोप लगाउँदै उनले छानबिन गरी कारबाही गर्न माग पनि गरेका छन् ।
“सिन्धुपाल्चोक जिल्ला इन्द्रावती गाउँपालिका वडा नं-७, सिपापोखरेमा भएको घटनाले नेकपा (एमाले) सिन्धुपाल्चोक जिल्ला कमिटीलाई दुखित बनाएको छ । २०७७/१२/२४ गते मेलम्ची खानेपानी विकास समितिको सहयोगमा समुदायलाई एम्बुलेन्स हस्तान्तरण गर्न आयोजना भएको कार्यक्रममा प्रमुख अतिथि कसलाई बनाउने भन्ने विषयमा सामान्य विवाद भएको थियो । यही विषयलाई लिएर प्रदेश माननीय एंव पूर्वसामाजिक विकासमन्त्री युवराज दुलालले नेकपा (एमाले) जिल्ला कमिटी सदस्य एवं इन्द्रावती मेलम्ची सामाजिक उत्थान कार्यक्रमका अध्यक्ष विष्णुमणि आचार्य र सोही संस्थामा कार्यरत कर्मचारी अशोक कोइरालालाई कार्यक्रमस्थल राजेश्वरी माध्यमिक विद्यालयको प्रांगणमै हातपात गरेका छन् । दुलाल नेतृत्वमा रहेको एक समूहले सामूहिक रुपमा हातपात गर्दा संस्थाका कर्मचारी अशोक कोइरालाको आँखामा चोटसमेत लागेको छ । यस्तो अमर्यादित र अशोभनीय व्यवहारको घोर भर्त्सना गर्दै घटनाको छानबिन गरी दोषीउपर यथोचित कारबाहीको लाग जोडदार माग गर्दछु," विज्ञप्तिमा भनिएको छ ।