टोकियो । अमेरिकी विदेशमन्त्री माइक पोम्मपेओ चीनविरुद्धको रणनीति बनाउनका लागि जापान पुगेका छन् । उनले जापानमा अस्ट्रेलिया, भारत र जापानका विदेशमन्त्रीहरुसँग छलफल गर्ने भएका छन् । 

चीनको आक्रामक व्यवहारविरुद्ध चार मुलुकहरुको 'क्‍वाड बैठक' लक्षित हुने बीबीसीले जनाएको छ । संयुक्त राज्य अमेरिका र चीनबीचको सम्बन्धमा पछिल्ला महिनाहरुमा दशकौंपछिको पहिलो पटक गिरावट आएको देखिन्छ । 

वाशिङ्टनले चिनियाँ प्रभुत्वको सामना गर्न क्षेत्रीय मित्रहरूसँगको सहयोग बढाउनको लागि अग्रसर भएको छ । 

क्‍वाड समूहमा पोम्पेओसहित जापानका तोशिमित्सु मोतेगी, अष्ट्रेलियाका मराइज् पेने र भारतका सुब्रह्मण्यम जयशंकरले प्रतिनिधित्व गरेका छन् । उक्त बैठकमा कोरोना भाइरस महामारी र साइबर सुरक्षालगायतका विषयमा छलफल हुने अपेक्षा गरिएको छ ।

अमेरिका छोड्‍नुअघि पत्रकारसँग कुरा गर्दै विदेशमन्त्री पोम्पेओले भने, "हामी लामो समयदेखि एकै ठाउँमा आउनका लागि काम गरिरहेका थियौं । स्वतन्त्र, सशक्त र समृद्ध राष्ट्रहरु मिलेर स्वतन्त्र र खुला # इण्डोप्यासिफिकको लागि हाम्रो साझा दृष्टिलाई प्रबर्द्धन गर्न बढ्दो सहयोगको बारेमा छलफल गर्न अगाडि बढिरहेका छौं ।"

चीनले तेस्रो पक्षलाई लक्षित गर्ने 'विशेष समूह' विरुद्धको बैठक अगाडि चेतावनी दिएको छ ।

एएफपीले चिनियाँ विदेश मन्त्रालयका प्रवक्ता वाङ वेनबिनलाई उद्धृत गर्दै भनेको छ, "हामी आशावादी छौं कि सम्बन्धित देशहरूले यस क्षेत्रका देशहरूको साझा हितबाट अघि बढ्न सक्दछन् र क्षेत्रीय शान्ति, स्थायित्व र विकासका लागि अनुकूल हुने अझ बढी कामहरू गर्न सक्दछन्, अन्यत्र होइन ।"

पहिलो क्वाड बैठक गत वर्ष न्यू योर्कमा भएको थियो - यद्यपि यो समूह औपचारिक गठबन्धन होइन । - बीबीसी