एजेन्सी । ओस्कर अवार्डबाट सम्मानित चर्चित भारतीय संगीतकार एआर रहमानमाथि कर छलीको आरोप लागेको छ । आयकर विभागले मद्रास उच्च अदालतमा मुद्दा दायर गरेपछि अदालतले रहमानलाई नोटिस जारी गरेको हो ।
आयकर विभागको अपिलमा जस्टिस टीएस शिवंगनानम र जस्टिस वी भवानी सुब्बोरोयनको ब्याचले रहमानविरुद्ध नोटिस जारी गरेको हो । आयकर विभागका अनुसार रहमानले उनको परोपकारी ट्रस्ट एआर रहमान फाउन्डेशनको प्रयोग गरी कर छली गरेको हो ।
आयकर वकिल टीआर सेंथिल कुमारका अनुसार सन् २०११–१२ मा रहमानले यूकेको कम्पनी लिब्रा मोबाइलको सम्बन्धमा ३.४७ करोड रुपैयाको कर तिर्नुपर्ने थियो ।
उक्त कम्पनीसँग रहमानको ३ वर्षका लागि विशेष रिंगटोन बनाउने सम्झौता थियो, र सम्झौता अनुरुपको पारिश्रमिक रहमानले आफ्नो फाउन्डेशन रहमानको नाममा ट्रान्सफर गरेको थियो ।
रहमानले कर तिर्नुपर्ला भनेर त्यो रकम आफ्नो परोपकारी कोषमा हस्तान्तरण गराएको आयकर विभागले आरोप लगाएको छ । - नवभारत टाइम्स