काठमाडौं । नेपाल कम्युनिस्ट पार्टी (नेकपा)का उपाध्यक्ष वामदेव गौतमले महाकालीमा  राष्ट्रघात भयो भन्दा तत्कालीन एमालेले अन्याय गरेको बताएका छन् ।

पार्टी स्थायी कमिटीको आजको बैठकमा बोल्दै उपाध्यक्ष गौतमले एकीकृत महाकाली सन्धिको विषयलाई पार्टी विभाजन भएको स्मरण गरेका हुन् ।

“यो बैठक समक्ष म एउटा कुरा भन्छु– मलाई विगतमा जुन अन्याय भएको थियो, अब मलाई न्याय दिनुपर्यो,” उनले बैठकमा भनेका थिए ।

उनले महाकाली सन्धिको प्रस्ताव आउँदा सुरुमा आफूले नपढेको र पार्टीका तत्कालीन महासचिव माधवकुमार नेपालले ठीक छ भनेपछि सुरुमा कन्भिन्स पनि भएको बताएका थिए । अध्ययनका क्रममा एकीकृत महाकाली सन्धि राष्ट्रघात हो भन्ने ठहरपछि आफूले विरोध गरेको र त्यसले पार्टी विभाजनको तहसम्म पुर्याएको बताएका थिए ।

“त्यतिबेला सीमा नदी भनेपछि उद्गमस्थल कहाँ हो भनेर टुङ्गो लगाएकाे भए हुन्थ्याे । नटुङ्गिएपछि मैले टुङ्ग्याउँ पनि भनेको हुँ । महाकाली सन्धि देशको हितमा छैन । यो देशको हितमा बनाऊँ भनेर अन्तिमसम्म अडान लिएँ । त्यो बेला सुनुवाइ भएन । पार्टीभित्र सङ्घर्ष भयो । संसदभित्र पनि सङ्घर्षले प्रवेश पायो । भोट क्रस, विभाजन भयो । पार्टी विभाजनको तीतो क्षण बेहोर्यौं,” उनले सम्झिएका थिए ।

आज महाकाली नदीको उद्गमको बारेमा मुलुक जुन ठाउँमा आइपुगेका छ, त्यसको मुख्य कारण त्यतिबेलाको चेतना र संघर्ष भएको उनको ठहर थियो ।

“आज लिम्पियाधुरासहितको नक्सा जारी गरेर सरकारले ठीक गरेको छ,” उनले सरकारलाई धन्यवाद दिँदै भने, “हिजो हामीमाथि जुन कुरा उठाउँदा कारबाही भयो, त्यो कुराको पुनर्विचार गरियोस् । हामीलाई अन्याय भएकै रहेछ !”