काठमाडौं । टेकुस्थित शुक्रराज ट्रपिकल तथा सरुवा रोग अस्पतालमा उपचाररत दुई जना कोरोना संक्रमितहरूको मंगलबार पुनःकोरोना परीक्षण गर्ने तयारी भएको छ ।
अस्पतालका निर्देशक डा. सागरराज भण्डारीले उपचाररत दुवै कोरोना संक्रमितको मंगलबारै राष्ट्रिय जनस्वास्थ्य प्रयोगशालामा कोरोना परीक्षणका लागि नमुना पठाउने तयारी रहेको बताए ।
“आज बेलुकासम्ममा दुवै जनाको पुनः कोरोना परीक्षणका लागि नमुना संकलन गरेर राष्ट्रिय जनस्वास्थ्य प्रयोगशालामा पठाउने तयारी छ,” उनले भने, “दुवै कोरोना संक्रमितहरूको स्वास्थ्य अवस्था सामान्य रहेको छ ।”
गत चैत्र ४ मा फ्रान्सबाट कतार हुँदै काठमाडौं आएकी १९ वर्षीया युवती र युएईबाट चैत ६ मा काठमाडौं आएका धादिङका ३२ वर्षीय पुरुषमा कोरोनाको संक्रमण देखिएपछि अस्पतालको आइसोलेनमा उपचाररत छन् । उनीहरू दोस्रो र तेस्रो कोरोना संक्रमित हुन् ।
नेपालमा हालसम्म पाँच जनामा कोरोनाको संक्रमण पुष्टि भएको छ । एक अस्पतालमा उपचारपछि निको भएका छन् भने अन्य दुई जना धनगढीको सेती प्रादेशिक अस्पताल र धवलागिरि अञ्चल अस्पतालको आइसोलेसनमा उपचाररत छन् । स्वास्थ्य तथा जनसंख्या मन्त्रालयको तथ्यांकअनुसार कोरोनाको आशंकामा हालसम्म ९ सय ९३ जनाको परीक्षण भएको जनाइएको छ ।