काठमाडौं । नेपाल चेम्बर अफ कमर्सले राष्ट्रपति विद्यादेवी भण्डारीसँग शिष्टाचार भेट गरेको छ । चेम्बरको ६९ औं वार्षिक साधारण सभा, चेम्बर दिवस २०७६ तथा ७० वर्ष प्रवेशको कार्यक्रममा सहभागी हुन देशका विभिन्न ठाउँमा आएका व्यवसायीले मंगलबार राष्ट्रपतिसँग भेट गरेका हुन् ।
भेटमा चेम्बर अध्यक्ष राजेशकाजी श्रेष्ठले संघीय प्रणालीपछि करको दरमा एक रूपता नहुँदा एकीकृत कर प्रणाली लागू गरिनुपर्ने बताए । ७० वर्षको अवधिमा निजी क्षेत्रको सशक्तीकरणका लागि चेम्बरले निर्वाह गरेको भूमिकाबारे चर्चा गर्दै चेम्वरको संरचना तथा अन्तर्राष्ट्रिय व्यावसायिक सम्बन्ध र त्यसबाट मुलुकले प्राप्त गरेको लगानी तथा व्यापारको योगदानबारे राष्ट्रपतिलाई जानकारी गराएका थिए ।
भेटमा राष्ट्रपति भण्डारीले समृद्ध नेपाल सुखी नेपालीको सपना साकार पार्न सरकारको प्रयासलाई सघाउन आग्रह गरिन् । उनले स्वाधीन अर्थतन्त्र निर्माण गर्ने दिशातर्फ उन्मुख हुने सरकारको प्रयासलाई सहयोग गर्न पनि आह्वान गरिन् ।
अबको चुनौती भनेको वैदेशिक रोजगारीमा गएका नेपालीहरू स्वदेश फर्किएमा उनीहरूको व्यवस्थापन गर्न अहिलेदेखि नै प्रयासरत हुन जरुरी छ उनले भनिन्, यसको महत्त्वपूर्ण जिम्मेवारी निजी क्षेत्रको हो ।