काठमाडौं । घरमै बसेर सेकेण्ड ह्याण्ड मोटरसाइकल किन्न र बेच्न सक्ने गरी एएम नेपाल प्रालीले 'भटभटे एप' प्रयोगमा ल्याएको छ । यसमा मोटरसाइकल बेच्न चाहनेले सजिलै आफ्नो मोटरसाइकलको तोकिएको विवरण सो एपमा पोष्ट गर्न सक्छन् । किन्न चाहनेले सिधा बिक्रेतालाई अनलाइन सम्पर्क गरेर खरिद गर्न सक्नेछ । टुटल र पठाओजस्ता माध्यमले मोटरसाइकलबाट यात्रु ओसारपसार गरेर चर्चा बटुलिरहेको बेला केवल मोटरसाइकल किनबेच गर्न चाहने उपभोक्तालाई लक्षित गरी 'भटभटे एप' विकास गरिएको बताइएको छ ।
" 'भटभटे एप' प्रयोग गरी सेकेण्ड ह्याण्ड मोटरसाइकल बेच्न किन्न सकिन्छ, रिकण्डिसन हाउससम्म धाउन पर्दैन,” एएम नेपाल प्रालीका महाप्रबन्धक खेमराज देवकोटाले भने । यो बाइक किनबेचको उत्कृष्ट “प्लेट फर्म” रहेको महाप्रबन्धक देवकोटाले प्रष्ट गरे । उपत्यकामा मात्रै झण्डै नौ लाख २१ हजार नौ सय १७ मोटरसाइकलको संख्या रहेको छ ।
स्मार्ट एन्ड्रोइड फोन हुनेले गुगल प्ले स्टोर र आइफोन प्रयोगकर्ताले एप स्टोरमा गएर 'भटभटे एप' निशुल्क डाउनलोड गरी इन्स्टल गर्न सक्ने एएम नेपाल प्रालिका कार्यालय व्यवस्थापक सुदीप पाण्डेले बताए । हाल यो निुशल्क छ । करिब ३० हजार प्रयोगकर्ताले एप डाउनलोड गरेपछि र दुई हजार बढीले बेच्न चाहनेले मोटरसाइकल पोष्ट गरेपछि बिक्रेताले बाईक पोष्ट गर्न प्रति बाइक रु ५०० शुल्क लाग्ने जनाएको छ ।
“सहज, कम मूल्य र सजिलो सवारी साधनको रुपमा रहेको मोटरसाइकल बेच्न र किन्न चाहनेलाई प्रविधिको प्रयोग गरी सिधा सम्पर्क गराउन एप ल्याइएको हो, यसमा चाहेको मूल्यको मोटरसाइकल किन्न सहज हुनेछ,” व्यवस्थापक पाण्डेको भने ।
हाल २० हजार प्रयोगकर्ताले यो एप प्रयोग गरिरहेका छन । करीब हजारको हाराहारीमा मोटरसाइकल बिक्रीको लागी राखिएको प्रालिका व्यवस्थापक पाण्डेले जानकारी दिए ।
