काठमाडौं । बंगलादेशको अन्तरिम सरकारका प्रमुख मोहम्मद युनुसले पूर्वप्रधानमन्त्री शेख हसिनालाई भारतीय भूमिबाट राजनीतिक बयानबाजी दिन रोक्न आफूले भारतीय प्रधानमन्त्री नरेन्द्र मोदीलाई गरेको आग्रहलाई बेवास्ता गरिएको आरोप लगाएका छन् ।

युनुसले गएको अप्रिलमा बैंककमा बिम्स्टेक शिखर सम्मेलनका बेला द्विपक्षीय भेटघाटमा मोदीसँग हसिनालाई भारतबाट राजनीतिक वक्तव्य दिन रोक्न अपिल गरेका जनाइएको छ ।

लन्डनको च्याटम हाउसमा बुधबार (जुन ११) आयोजित कार्यक्रममा युनुसले भने, “हसिनाको प्रत्यर्पणका निम्ति बांगलादेशले भारतसँग प्रयास जारी राख्नेछ ।”

उनले अगाडि भने, “हामी भारतसँग धेरै राम्रो सम्बन्ध राख्न चाहन्छौँ । त्यो हाम्रो छिमेकी देश हो । हामी उनीहरूसँग कुनै समस्या भएको चाहँदैनौँ । तर, भारतीय प्रेसको फेक न्युजले गर्दा हरेक समय केही न केही समस्या आइरहन्छ ।”

“यसले बंगलादेशलाई चिन्तित बनाउँछ । हामी यसलाई नियन्त्रण गर्न प्रयास गर्छौं, तर साइबर स्पेसमा धेरै चिज हुँदै रहन्छ र हामी त्यसबाट अलग रहन सक्दैनौँ,” उनले थपे ।

युनुसले भने, “हामी शान्त रहने प्रयास गर्छौं, तर अचानक केही घटना घट्छ र फेरि उत्तेजित बनाउँछ । यो समयमा हाम्रा निम्ति शान्ति स्थापित गर्नु नै ठूलो काम हो ।” बीबीसी हिन्दीबाट ।