काठमाडौं । अमेरिकाको एक संघीय अदालतले राष्ट्रपति डोनाल्ड ट्रम्पको व्यापक आयात कर लगाउने निर्णय रोकिदिएको छ । 

विदेशबाट अमेरिका आउने सामानमा व्यापक आयात कर लगाउने डोनाल्ड ट्रम्पको आर्थिक नीतिको एक प्रमुख अंश हो ।

अमेरिकाको अन्तर्राष्ट्रिय व्यापार अदालतले ट्रम्पले जारी गरेकोे आपत्‌कालीन कानुनले राष्ट्रपतिलाई हरेक देशमा एकतर्फी रूपमा ‘ट्यारिफ’ लगाउने अधिकार नदिने आदेश जारी गरेको बीबीसीले जनाएको छ ।

अमेरिकाको न्युयोर्क राज्यका महान्याधिवक्ता जनरलले यो निर्णयको स्वागत गरेका छन् । 

अदालतले ट्रम्प प्रशासनले चीन, मेक्सिको र क्यानाडामा लगाएको करमा पनि रोक लगाएको छ ।

ट्रम्प प्रशासनले यस निर्णयविरुद्ध पुनरावेदन गरेको छ । ह्वाइट हाउसका प्रवक्ताले भने, “राष्ट्रिय आपत्‌काललाई कसरी सम्बोधन गर्ने भन्ने निर्वाचित नभएका न्यायाधीशहरूले निर्णय गर्ने कुरा होइन ।”

यो आदेशलाई अमेरिकाले चीन, मेक्सिको र क्यानडामा लगाएका छुट्टै करहरूलाई पनि रोक लगाएको छ । अमेरिकामा डेमोक्र्याट पार्टीले अदालतको फैसलालाई स्वागत गरेका छन् ।

एक वाइन आयातकर्ता र साइकल स्टोर कम्पनीहरूले यो मुद्दा दर्ता गरेका थिए । न्युयोर्कमा अवस्थित वाइन आयातकर्ता कम्पनीले आयात करले उसको व्यवसाय मात्र नभएर उनीहरूमा आश्रित किसानहरूको जीविकालाई पनि जोखिममा पारेको बताएको छ । 

यो कानुनी चुनौतीमा संलग्न अन्य व्यवसायहरूमा भर्मन्ट राज्यको एक अनलाइन साइकल स्टोर र भर्जिनियाको चार्लट्सभिल्लमा रहेको एक सानो इलेक्ट्रोनिक्स निर्माता पनि समावेश छन् ।