काठमाडौं । जनता समाजवादी पार्टी, नेपालका अध्यक्ष उपेन्द्र यादवले सरकारले ल्याएको भूमिसम्बन्धी केही नेपाल ऐनलाई संशोधन गर्न बनेको विधेयक संविधानविपरीत भएको बताएका छन् । नेपालको संविधानको अनुसूची–६ अनुसार भूमि व्यवस्थापन, जग्गाको अभिलेख प्रदेशको क्षेत्राधिकारभित्र पर्ने उनले उल्लेख गरेका छन् ।

“भूमिसम्बन्धी ऐन बनाउने अधिकार संविधानले प्रदेश सरकारलाई दिएको छ । संसद्मा संघीय सरकारले यो विधेयक संविधानविपरीत ल्याएको छ,” उनले सोमबार (जेठ ५) राति सामाजिक सञ्जाल फेसबुकमा लेखेका छन् ।

संविधानको उल्लंघन गरी संघीय लोकतान्त्रिक गणतन्त्रलाई नै समाप्त पार्ने षड्यन्त्र गरिएको उनको आरोप छ । “भूमाफियाको खेलमा लागेर गरिएको यस्तो राष्ट्रघाती र संविधानविरोधी कार्यको घोर विरोध र भर्त्सना गर्दछु,” उनले लेखेका छन् ।

उक्त विधेयक सरकारले तुरुन्त फिर्ता लिनुपर्नेमा उनले जोड दिएका छन् । “सुकुम्वासी समस्या समाधान गर्ने नाममा ल्याइएको भनिएता पनि यसले सुकुम्वासी समस्या हल गर्न सक्दैन,” अध्यक्ष यादवले लेखेका छन्, “यसबाट घरजग्गा व्यवसायी तथा भूमाफिया, जग्गा दलाललाई विशेष फाइदा हुनेछ ।”