काठमाडौं । गत वर्षको असोज ११ र १२ गतेको भीषण बाढीले क्षतिग्रस्त वाग्मती साना जलविद्युत् आयोजनाको पुनर्निमाण भइरहेको छ । आयोजनाको जडित क्षमता बढाएर ३२ मेगावाट पुर्‍याइएको छ । क्षति हुनुअघि आयोजनाको जडित क्षमता २२ मेगावाट थियो । पुनर्निमाणका क्रममा आयोजनाको क्षमता १० मेगावाट पुगेको माण्डु हाइड्रोपावर लिमिटेडले जनाएको छ ।

आयोजनाबाट थप विद्युत् उत्पादन अनुमतिपत्र (लाइसेन्स) र नेपाल विद्युत् प्राधिकरणसँग विद्युत् खरिदबिक्री सम्झौता (पीपीए) भएको विकासकर्ता कम्पनी माण्डु हाइड्रोपावरले जनाएको छ ।

अविरल वर्षाले वाग्मतीमा गएको भीषण बाढीले माण्डु हाइड्रोपावरले सञ्चालन गरिरहेको २२ मेगावाटको वाग्मती साना जलविद्युत् आयोजना बन्द छ । क्षतिग्रस्त आयोजना पुनर्निमाण गरी चाँडै सञ्चालनमा ल्याउने कम्पनीले जनाएको छ । 

अविरल वर्षाले आयोजनाको विद्युत्‌गृह र हेडवर्क्सलगायत अन्य संरचनामा ठूलो क्षति पुगेपछि बिजुली उत्पादन बन्द भएको छ ।

आयोजना बाढीले क्षतिग्रस्त हुनुअघि माण्डु हाइड्रोपावरले गत आर्थिक वर्ष २०८०/०८१ को नाफाबाट सेयरधनीलाई १२ प्रतिशत नगद लाभांश दिने प्रस्ताव गरेको थियो । कम्पनीले चुक्ता पुँजीको १२ प्रतिशत अर्थात् १६ करोड ३६ लाख ३६ हजार रुपैयाँ नगद लाभांश दिन प्रस्ताव गरेको थियो । माण्डुको चुक्ता पुँजी एक अर्ब ३६ करोड ३६ लाख रुपैयाँ छ ।