काठमाडौं । भारतको मुम्बईमा भएको आतंककारी आक्रमणमा संलग्न रहेको आरोप लागेका ताहाव्वुर हुसेन राणालाई अमेरिकाबाट भारत सुपुर्दगी गर्न लागिएको छ । राणालाई अमेरिकाबाट भारत ल्याउन लागिएको भारतको समाचार संस्था पीटीआईले जनाएको छ ।

भारत ल्याएपछि राणालाई दिल्लीको तिहाड जेलको एक उच्च सुरक्षा वार्डमा राखिने सम्भावना रहेको समाचारमा उल्लेख छ । यसका लागि जेलमा सबै आवश्यक तयारी पूरा गरिसकिएको जेल अधिकारीहरूले बताएका छन् ।

पाकिस्तानमा जन्मिएका ६४ वर्षीय राणा क्यानाडाका नागरिक भएको बताइएको छ । सन् २००८ को मुम्बईमा भएको आतंककारी हमलाका उनी मुख्य योजनाकार डेभिड कोलम्यान हेड्ली उर्फ दाउद गिलानीको नजिकको सहयोगी भएको बताइएको छ । उनको भारतमा सुपुर्दगी रोक्न गरिएको अन्तिम उजुरी अमेरिकी सर्वोच्च अदालतले खारेज गरेपछि उनलाई भारत ल्याउन ल्याउन लागिएको हो ।

भारतीय अधिकारीहरूका अनुसार, उनलाई भारत ल्याउन एक उच्चस्तरीय टोली अमेरिका गएको छ ।

सन् २००८ नोभेम्बर २६ मा १० जना पाकिस्तानी आतंकवादीले अरब सागरको समुद्री मार्ग हुँदै भारतको आर्थिक राजधानी मुम्बई प्रवेश गरी रेलवे स्टेसन, दुई सात तारे होटल र एक यहुदी केन्द्रमा आक्रमण गरेका थिए । करिब ६० घण्टा लामो आक्रमणमा परी १६६ जना मारिएका थिए ।