काठमाडौं । नेपाल पानीजहाज कार्यालयबाट उद्योग सञ्चालन अनुमति नलिई व्यावसायिक रूपमा पानीजहाज सञ्चालन गर्न नपाइने प्रस्ताव गरिएको छ । राष्ट्रियसभाअन्तर्गतको विधायन व्यवस्थापन समितिमा पानीजहाज (सञ्चालन तथा व्यवस्थापन) विधेयकमाथिको दफावार छलफलका क्रममा यस्तो प्रस्ताव गरिएको हो ।

समितिका उपसचिव नुमराज खनाल शर्माले कुनै पनि व्यक्ति वा संस्थाले पानीजहाज सेवा सञ्चालन गर्न कार्यालयमा निवेदन दिएर स्वीकृति लिनुपर्ने प्रस्ताव गरिएको सुनाए । उद्योगको आर्थिक तथा प्राविधिक पक्ष, व्यवस्थापकीय क्षमता र सार्वजनिक हितलाई समेत ध्यानमा राखी तोकिएबमोजिम मूल्यांकन गर्दा आवश्यक सर्त पूरा गरेको पाइए कार्यालयले पानीजहाज सञ्चालन गर्न अनुमति दिन सक्ने उनले बताए ।

“उद्योग सञ्चालन अनुमति नलिई कसैले पनि व्यावसायिक रूपमा पानीजहाज सेवा सञ्चालन गर्न पाइने छैन । कुनै व्यक्ति वा संस्थाले पानीजहाज सेवा सञ्चालन गर्न चाहेमा सोको अनुमतिका लागि कार्यालयमा तोकिएबमोजिम निवेदन दिनुपर्नेछ,” उनले भने ।

नेपाल पानीजहाज कार्यालयका कायममुकायम रजिस्ट्रार मणिराम भुसालले देशले आफ्नै पानीजहाज खरिद गरी विदेशी समुद्रमा चलाउन कानुनी व्यवस्था गरिनुपर्ने बताए ।

भारतलगायत देशका समुद्रमा पानीजहाज खरिद गरी सञ्चालन गर्न सरकारले विधेयक तर्जुमा गरिरहेको बताइएको छ । न्युज एजेन्सी नेपाल